Ministri i Mirëqenies Sociale dhe Rinisë Erion Veliaj gjatë nja takimi me studentët e Universitetit të Tiranës tha se risia e reformës së pensioneve është dhe pensioni social.
“Ne duam të vendosim një pension social, duke i dhënë vëmendje asaj pjese të popullsisë që është e papunë dhe nuk ka mundësi të paguajë kontribute”, tha Veliaj.
Në një bashkëbisedim me studentë të Universitetit të Tiranës ministri Veliaj sqaroi rëndësinë e reformës së pensioneve, sidomos për brezin e ri.
Duke u ndalur tek propozimet për këtë reformë, Veliaj tha se për të rinjtë e sotëm, që kanë një punë më të mirë dhe po ashtu një rrogë më të mirë do të hiqet tavani i kontributeve.
“Kështu, tavani i pensionit do të funksionojë si llogaria në një depozitë bankare, por që do ta mbajë Instituti i Sigurimeve Shoqërore. “Kjo do të thotë që ai që paguhet me një rrogë të mirë dhe derdh një kontribut të lartë do të ketë dhe një pension të mirë”, tha ministri Veliaj.
Sipas tij, gjenerata e të rinjve të sotëm do të jetë e para që do të përfitojë nga skema e re e pensioneve dhe janë ata, që pas 30 vjetësh kur do të dalin në pension, do të vjelin frytet e ligjit të ri.