Vendimi i Qeverisë: Lejet e qarkullimit për automjetet jepen me koncesion

Qeveria ka vendosur të kalojë te privati një ndër procedurat kryesore në rastin e blerjes apo importimit të makinave. Me vendimin e djeshëm, i është dhënë e drejta Ministrisë së Transportit për zgjedhjen e një kompanie private dhe dhënien me koncesion të Shërbimit të Kontrollit dhe Verifikimit të mjeteve rrugore në Republikën e Shqipërisë.

Bëhet fjalë për kontrollin teknik që duhet të kryejë çdo makinë para se të marrë lejen e qarkullit. Ky kontroll, që sot bëhet në zyrat e Drejtorisë Rajonale të Shërbimeve të Transportit Rrugor, do të kalojë në dorë të privatit.

Këtë kontroll duhet ta bëjë cilido që blen një makinë nga jashtë apo brenda vendit. Para se të marrësh lejen e qarkullimit, sot inspektorët e Drejtorisë së Transportit kontrollojnë numrin e shasisë, gjendjen e mjetit, llojin e karburantit që konsumon, numrin e vendeve, kubaturën e motorit, si dhe disa karakteristika të tjera.

Në gjuhën e kodit rrugor, kontrolli quhet “verifikim i përputhjes me tipin e homologuar të mjeteve me motor”. Është kjo procedurë që do të tenderohet dhe do të kalojë në duart e privatit. Pas miratimit të lejes koncensionare, sigurisht që do të ketë edhe një tarifë për shërbimin.