VENEDIK / Edi KM shastis miqtë me origjinën e tij të dhjetëfishtë

Shoqëruesit italianë nuk u çuditën shumë disa muaj më parë, kur artistin Edi KM e përshëndesnin rrugëve të Venedikut: “Ciao cusin, co’mea”, dhe i interesuari ua kthente përshëndetjen shpenguar po në dialektin e vështirë venecian.

Siç do pohonin ata më pas për Gojët e Liga, “Epo thamë, burri i botës artist, pastaj kryeministër, pa le pastaj ish sportist… kushedi sa njohje ka”.

Mirëpo brenda atyre pak orëve, si ta kishin të afërm, KM-n e përshëndetën njerëz të panjohur në anglisht, frëngjisht, madje edhe në shqip, në disa dialekte: “Uore kusho, ça bën, do rrish na ca?”, “Naqe, kur paske ardh mor ta marrsha?”, “Qy qy, boti, po ti ça do në Venect’ ere” etj etj.

Me nuhatjen që e karakterizon, artisti kryeministër e kuptoi konfuzionin e italianëve, dhe nisi t’i sqarojë:

“Mos u çuditni, po unë kam kushërinj gjithandej nëpër Europë. Sepse origjina ime është një përzierje e paparë. Mai vista, hai capito? A melting pot, siç thonë portugezët. Në dejet e mi rrjedh gjak venecian, shkodran, mirditor, beratas, durrsak, himariot… ca pika i kam napolitane, nga Anzhuinët e Napolit, pra jam edhe disi francez; ndërsa një degë e brezit të dhjetë para meje ka ardhur nga Aragonezët spanjollë… Tani që po e mendoj, përderisa kam kaq qejf t’i bie defit dhe të këndoj këngë qejfi, mund të jem dhe pak egjiptian… Lëre, histori e gjatë”.    

Në vijim, Edi u shpjegoi miqve të mahnitur se kjo është arsyeja pse ai flet pa teklif me Macronin në telefon, me turli lloj ministrash italianë, englezë, madje edhe me liderët e Turqisë.

“Helbete,” u tha Edi, “purtroppo, mund të kem edhe ndonjë damar nga Azia e Vogël, kushedi”.

KM rrëfeu se kurioziteti për të gjurmuar prejardhjen e tij, faktikisht zuri fill nga xhelozia e çuditshme që provoi kur Bruno Vespa shqiptar, nisi të pretendojë lart e poshtë se kishte shtatë gjyshër, katër palë prindër dhe një mozaik xhaxhallarësh, gjysmë-vëllezërish, çerek motrash, tezesh e dajosh.

“U knoq në prona biri i botës, me gjithë atë origjinë të larmishme që kishte”.

Atë çast italianët u ftilluan: “Aaa, il signor Fevxiu! Po po, e njohim. A mund të na ndihmosh ta takojmë dhe t’i marrim një autograf?”

Këtu Edit nuk i erdhi mirë. Nisi të përtypej dhe tentoi të ndërronte temë. Por atë çast, një artdashës u afrua dhe e përshëndeti gjermanisht. Folën përzemërsisht për nja tre minuta, pastaj gjermani u largua. Gjithë çfarë kuptuan italianët, ishte se KM i premtoi nemçes se do t’i çonte të falat në vend.

-Edhe ky gjermani, kushëri? – e pyetën ata.

-Jo mo çne! Të kisha rrënjë gjermane, nuk do më rrinte Merkeli hundë e buzë – ua ktheu KM, – thjesht e njoh. Është farefis i Pandi Majkos, nga Bremeni. Se Pandi ka origjinë gjermane, nga një katragjysh mjek që punonte në oborrin e Ali Pashës…

*****

SHËNIM: Gojët e Liga është një rubrikë satirike. Origjina e shumëfishtë e kryeministrit, jo