Zoti Venizellos, për fat të keq, kjo shkresë ju përgënjeshtron

Zoti Venizellos tha dje në Tiranë se ligji 2636 i vitit 1940, ose ligji i luftës me Shqipërinë është hequr në 1987. Por DITA boton sot një shkresë që daton 12 vjet më pas në të cilën Ministria e Jashtme Greke shkruan qartë: Ligji 2636 është në fuqi.

Zoti Venizelos ka thënë dje në Tiranë gjatë takimeve me zyrtarët shqiptarë se ligji i luftës me Shqipërinë, ose sic njihet ndryshe ligji 2636 i vitit 1940 është hequr që në vitin 1987. Deklarata i ka bërë disi të  pakuptimta replikat e djeshme Bushati-Venizellos mbi këtë argument, por si përherë gjërat kanë mbetur pezull dhe të pasqaruara. Me sa duket, ky është edhe qëllimi. Por një dokument shpesh flet më shumë se dhjetëra deklarata.

Ne e pranojmë që është pak e rëndë të kapësh në gënjeshtër një kryediplomat, por shkresa që po boton sot DITA, për fat të keq konfirmon pikërisht këtë.

Duhet thënë që kjo shkresë që sheh dritën e botimit për herë të parë sot në DITA është e vetmja shkresë zyrtare që ka lënë një gjurmë të shkruar mbi një ligj me të cilin Athina zyrtare vazhdimisht ka “luajtur” duke u fshehur pas fjalëve dhe interpretimeve të kinse të ngatërruara juridike, pa lëshuar kurrë dokumenta zyrtarë.

Ky dokument me sa duket i ka shpëtuar “rregullit”. Dokumenti është një shkresë e Ministrisë së Jashtme greke, dërguar për Ambasadën e Shqipërisë në Greqi, në përgjigje të një shkrese të kësaj të fundit ku (me sa kuptohet nga përmbajtja) pala shqiptare ka pyetur nëse ligji i luftës është apo jo në fuqi.

Dhe pala greke përgjigjet: Ligji 2636 i vitit 1940 është në fuqi.Thuhet qartazi. Dokumenti mban datën 28 qershor 1999. Pra 12 vjet pas vitit 1987, vit të cilin zoti Venizellos e citoi dje si datën e heqjes së ligjit dhe pengesave që sjell ai.

Shkresa në fjalë që i jep një hije të qartë skandali ndërkombëtar deklarimeve gjatë vizitës së djeshem të zotit Venizellos është vënë në dispozicion të DITA-s nga një grupim që lobon për çështjen çame bashkë me një histori të përpjekjeve për ta zhdukur këtë shkresë më pas nga arkivat e Ministrisë së Jashtme.

Ne e ftojmë qeverinë greke apo çdo institucion tjetër përfaqësues të reagojë mbi këtë paradoks. Pyetja është e thjeshtë: Nëse përfaqësuesi i lartë i shtetit grek deklaron në një vizitë zyrtare se ligji i luftës është hequr në 1987, si është e mundur që një shkresë zyrtare e vetë shtetit helen që daton 12 vjet më pas thotë qartë që ky ligj ekziston?

Republika e Greqisë
Ministria e Punëve të Jashtme
E3 DIDDY
F. 237/269

NOTË VERBALE

Ministria e Punëve të Jashtme e Republikës së Greqisë i paraqet mirënjohje Ambasadës së Republikës së Shqipërisë dhe duke ju referuar shënimit të Ambasadës Nr. Prot. 131, datë 18.6.1999 ka nderin të informojë Ambasadës e nderuar që Ligjet greke, Nr. 2636/1940 dhe 4506/1966 janë akoma në fuqi.

Ministria e Punëve të Jashtme e Republikës së Greqisë përfiton nga rasti për t’i shprehur Ambasadës së Republikës së Shqipërisë konsideratat më të larta.

Athinë, 28 Qershor 1999

Dërguar Ambasadës së Republikës së Shqipërisë

Athinë (VULA e Ministrisë së Punëve të Jashtme të Greqisë)

Ligji i forcës 2636/1940 ose ligji i luftës Greqi-Shqipëri
Ligji me numër 2636/ 1940 është njihet si “ligji i forces” ose si ligji i luftës mes Greqisë dhe Shqipërisë i miratuar gjatë Luftës së Dytë Botërore. Me pretendimin se Shqipëria kishte ndihmuar ushtrinë italiane kundër Greqisë, ligji u hartua nga ministri grek i Drejtësisë së asaj kohe, Ajis Tabakopullos dhe ai i Financave, Apostolidhis. U dekretua më 10 nëntor të vitit 1940 nga Mbreti i Greqisë, Jeorjios B’. Në nenin 10 të ligjit u jepet e drejta personave të tretë që të përdorin pasuritë e paluajtshme të shtetasve të shpallur si armiq me ligjin e forcës. Në këto pasuri futen tokat bujqësore, trojet, objektet, fabrikat, punishtet, llogaritë bankare, prona intelektuale, etj.

*faksimile 2 – botimi i ligjit 26/36 ne 1940 ne Fletoren Zyrtare greke