Vetëvendosja, koalicion vetëm me LDK: Frikë nga Thaçi për një skenar maqedonas

E vetmja zgjidhje për Kosovën është një qeverisje e koalicionit mes Vetëvendosjes dhe LDK-së thotë Besnik Bislimi, shefi i shtabit zgjedhor të VV në një intervistë telefonike për Ora News.

“Qeverisje që nënkupton vetëm me LDK sepse Vetëvendosja nuk do të pranojë asnjë lloj qeverisje me PDK-në. Por kjo varet nga vullneti politik i Vetëvendosjes, AKR dhe LDK, dhe nga kushtëzimet e mundshme që mund të dalin gjatë bisedimeve të tilla.

Momentalisht nuk janë bërë ftesa zyrtare, por deklarime të eksponentëve të këtyre subjekteve dhe kemi Albin Kurtin që thotë se ndryshimi i vetëm vjen vetëm me një koalicion të Vetëvendosjes dhe LDK-së. Vetëm me Albin Kurtin kryeministër“, tha Besnik Bislimi.

Duke e akuzuar Thaçin si president që nuk ka qenë asnjëherë mbi palët, por shumë i përfshirë në procesin elektoral “me takime të fshehta dhe takime për të blerë vota” Vetëvendosja flet për dy skenarë të Thaçit, njëri prej tyre skenari i Maqedonisë.

“Nëse bisedimet nisin me LDK-në arrijnë në një pikë ..presidenti Thaçi ka dy opsione ose të reflektojë menjëherë  dhe ti japë mandatin koalicionit ose të ndjekë rrugën e Maqedonisë, ku përpiqet të bllokojë procesin duke dhënë mandatin një koalicioni që nuk ka mundësi të krijojë numrat. Nuk e përjashtoj mundësinë që PAN të bëjë pazare të tjera,sepse është strategji e tyre gjithmonë.

Nëse Thaçi dëshiron ti japë kohë koalicionit të parë atëherë synimi i vetëm i koalicionit është që të ketë kohë për blerje deputetesh dhe tregti të tjera”, tha Bislimi.