Sebastian Vettel në kufijtë e legjendës! Piloti gjerman i Red Bullit dje ka siguruar titullin e katërt botëror radhazi, kur kanë mbetur edhe tri gara nga fundi i kampionatit. Dje Vettel dominoi garën e Indisë dhe zuri vendin e parë, edhe pse i mjaftonte edhe i pesti për t’u shpallur kampion. Tani më mirë se ai janë vetëm dy pilotë, idhulli Shumaher dhe argjentinasi Fangio, përkatësisht 7 dhe 5 herë kampionë bote.
Janë plotësisht të arritshëm nga Vettel, ndërkohë që asnjëri prej tyre nuk kishte fituar katër tituj, aq më tepër radhazi, në moshën 26 vjeç. Piloti gjerman e mbylli në mënyrën më të mirë misionin për titullin e tij të katërt radhazi në botërorin e Formula 1, pasi edhe skuadra e tij arriti të fitonte titullin e konstruktorëve. I nisur me gomat e buta, përshkroi vetëm dy xhiro para se të ndalej, por edhe rikuperimi i më shumë se gjysmës së grupit u duk si një shëtitje për të. Në përfundim të garës, kampioni i katërfishtë u gjunjëzua para makinës së tij, në një gjest tepër domethënëse falënderimi për këtë makinë të mrekullueshme, e cila nuk njeh pengesa e rivalë.
Ndërkaq, Alonso doli menjëherë nga lufta për t’i shtyrë festën Vettelit teksa pati një kontakt me Webber në nisje, që i shkatërroi pjesën e përparme të makinës, duke e detyruar për një ndalesë të parakohshme. Tani spanjolli i Ferrarit mund të luftojë për vendin e dytë, pasi gara për të është ende e hapur, ashtu si dhe në renditjen e konstruktorëve. Por garat e mbetura mund të mos jenë thjesht formalitet edhe për Vettel, pasi ai ka ende diçka për të arritur. Fitorja e djeshme ishte e dhjeta në këtë kampionat dhe e gjashta radhazi. Nëse fiton të dielën e ardhshme në Abu Dabi, ai barazon rekordin e Shumaherit, me shtatë suksese radhazi në një kampionat.