Vizitorët e një kopshti zoologjik në Santiago janë shokuar të shtunën, teksa panë me sytë e tyre një të ri që shqyhej nga dy luanë.
20-vjeçari për arsye ende të paqarta, ishte zhveshur lakuriq dhe më pas ishte futur brenda kafazit duke iu vetëofruar si ushqim luanëve.
Menjëherë dy luanët u vërsulën mbi të duke e shqyer. E menjëhershme ka qenë ndërhyrja e rojave të sigurisë, të cilët janë detyruar të vrasin dy luanët, një femër dhe një mashkull për të shpëtuar të riun.
I riu është dërguar në spital për trajtim në gjendje të rëndë për jetën. Mediat lokale raportojnë se parku ishte i mbushur me vizitorë në momentin e incidentit.
Drejtorja e kopshtit zoologjik tha se ishte “thellësisht e prekur” nga vrasja e dy luanëve, por prioritet ishte shpëtimi i jetës së të riut.
Dëshmitarët në vendngjarje treguan se kishin dëgjuar të riun të artikulonte thirrje fetare dhe të përmendte emrin e Jezusit. Sipas tyre gjithçka ndodhi aty dukej sikur 20-vjeçari kishte tentuar të vetëvritej.
Edhe autoritetet policore kanë konfirmuar gjetjen e një shënimi vetëvrasje në rrobat e tij.
Sakaq informacionet e fundit mbi gjendjen shëndetësore të të riut mbrëmjen e së shtunës janë optimiste se ai mund të mbijetojë.
