Rritet numri i emigrantëve që kthehen pranë familjeve për të kaluar festën e Vitit të Ri. Sipas informacioneve të fundit, në pikën e kalimit kufitar në Kakavijë kanë hyrë në vendin tonë gjatë 24 orëve të fundit 3924 shtetas dhe 991 automjete të llojeve të ndryshme.
Gjithashtu, në dogana vihet re edhe largimi i një numri të konsiderueshëm shqiptarësh,të cilët kalojnë në shtetin grek për arsye pune ose për të kaluar festën me të afërmit e tyre. Sipas të dhënave nga policia kufitare, gjatë 24 orëve të fundit kanë hyrë nga territori shqiptar në atë grek 3115 shtetas me 886 mjete, vetëm nga pika kufitare e Kakavijës.
Në pikën e kalimit kufitar në Kapshticë mësohet se pala shqiptare punon me 4 sportele, ndërsa pala greke me 3 sportele. Gjatë 24 orëve të fundit në këtë pikë kanë hyrë 2831 persona me 898 automjete.