Presidenti irlandez Majkëll Higins, ka vizituar Britaninë e Madhe. Është një eveniment, pasi janë ulur në të njëjtën tryezë Mbretëresha Elizabetë dhe Martin Mekguines, ish- komandant i guerilasve të IRA-s, sot zv/kryeministër i Ulsterit. “Nuk ekziston një bashkëpunim më i mirë se sa ai mes qeverisë sime dhe asaj irlandeze” është shprehur mbretëresha Elizabetë. Takimi gjithashtu ka vulosur edhe pajtimin e Londrës dhe Dublinit. Një moment që ndoshta nuk do të kishte qenë i mundur pa shtrëngimin e duarve në qershor të 2012-ës, mes Mbretëreshës Elizabetë dhe Mekguines gjatë një vizite në Belfast. Presidenti irlandez Higins tha se dhimbja dhe sakrificat për pavarësinë e Irlandës kanë lënë një hije në marrëdhëniet mes dy vendeve, por tashmë marrëdhëniet janë përmirësuar ndjeshëm. Vizita e radhës është dhe pikëtakimi i një rrugëtimi të gjatë dhe të vështirë për ripajtimin mes dy vendeve. Në vitin 2011, Mbretëresha Elizabetë gjatë një vizite në Irlandë, vendosi një kurorë me lule për viktimat e rëna në luftën për pavarësinë e Irlandës nga Mbretëria e Bashkuar.