Derbi i të dëshpëruarve
Derbi i të dëshpëruarve është ndeshje që do të zhvillohet sot pasdite në stadiumin “Loro Boriçi” në Shkodër, ku Vllaznia do të presë Flamurtarin. Janë dy skuadra të deklaruara si pretendente në prag të sezonit, për shkak të merkatos që i përshtatej synimeve ambicioze. Që të dyja kanë ecur me të njëjtin hap, veçse jo drejt titullit kampion. Vllaznia e Flamurtari janë ndër zhgënjimet më të mëdha të sezonit, tepër poshtë Skënderbeut në majën e renditjes. Shkodranët vijnë pas barazimit pa gola me Besën në Durrës, ndërsa vlonjatët fituan në fundjavën e shkuar kundër Kukësit, por të mërkurën u mundën nga Skënderbeu në takimin e prapambetur të javës së dhjetë, një ndeshje që nuk u shpëtoi polemikave të zakonshme sa herë që luajnë këto dy skuadra. Vllaznia ka një pikë më tepër se Flamurtari dhe fitorja sot mund të ketë vlera të mëdha për luftën e kualifikimit në Europa League.
Takim i fortë pritet edhe në Kukës, ku vendasit presin Kastriotin, me synimin për të nisur një seri tjetër pozitive si ajo që u ndërpre javën e kaluar në Vlorë. Tirana, skuadër që tashmë është ngjitur në vendin e tretë pas dy fitoreve radhazi, do të ketë një test të fortë në Ballsh, kundër Bylisit, ku i pranishëm do të jetë Naxhi Shensoj, trajneri që do të zëvendësojë Agim Canajn në krye të vendasve. Në Berat, përsëri një sfidë mbijetese, me Tomorin që pret Shkumbinin.