Katër persona kanë grabitur dhe dhunuar një çift të moshuarish në qytetin bregdetar.
Policia e qytetit bregdetar njoftoi se grabitja është shënuar në një banesë në lagjen 1 Maji në Vlorë gjatë natës.
Burime policore bëjnë me dije se 2 persona kanë hyrë në banesën e çiftit nga dritarja në një kohë që një i tretë i ka rënë ziles së banesës për të tërhequr vëmendjen, ndërsa një tjetër i katërt ka pasur rolin e rojës.
Mësohet se pasi kanë hyrë në banesë një nga personat i maskuar dhe i armatosur ka mbajtur çiftin e të moshuarve në një dhomë, ndërsa një person i dytë ka kontrolluar banesën duke marrë një sasi parash, bizhuteri, sende të tjera me vlerë.
Policia e Vlorës thotë se ka nisur një hetim të plotë për identifikimin dhe arrestimin e autorëve të ngjarjes.