Voda: Protestat për shkak të reformës në drejtësi, do dalin dosjet e nxehta

Protesta e sotme e opozitës është e paligjshme në kuptimin e ligjit për tubimet, ndërsa pasojat do të bien mbi organizatorët dhe protestuesit. Është kjo deklarata e Zëvendësministres së Brendshme Rovena Voda në studion e ABC News.

“Do ketë angazhim të forcave të policisë, ka plan operacional nga policia, por fatkeqësisht opozita do veprojë në shkelje të ligjit për tubimet, se ka bërë një kërkesë për organizmin e protestës. Është kthyer mbrapsht kërkesa për t’u plotësuar me disa elementë nuk ka asnjë reagim nga PD dhe aleatët dhe për momentin policia nuk ka një vendim për të protestuar.

Pra sot në kuptimin e ligjit për tubimet është e paligjshme. Protesta do zhvillohet, policia do jetë në krye të detyrës do respektojë ligjin por pasojat do bien mbi organizatorët dhe protestuesit që në mënyrë të paligjshme do marrin pjesë në protestë”.

E gjithë kjo sipas zv/ministres ndodh për shkak të finalizimit të reformës në drejtësi, ku ka shumë dosje të nxehta që presim të dalin përgjegjësit para drejtësisë.

“Kemi të bëjmë me turmë të çoroditur, të dëshpëruar që për shkak të reformës në drejtësi që po troket finalizimi. Ajo që ne presim është krijimi SPAK dhe BKH për korrupsionin dhe krimet e rënda dhe ka dosje të nxehta që ne presim të dalin përgjegjësit para drejtësisë.

Nëse opozita do mendonte për të mirën në Shqipërisë nuk do duhet të bëhej pengesë për finalizimin e reformës në drejtësi dhe krijimin e këtyre dy institucioneve ku dalja e opozitës e vonoi”.

v.l/ Dita