Vrasja e efektivit, Rama kritika opozitës: Vajmedet PD, veç llum e për lumë

Kryeministri Rama përmes një postimi në rrjetin social Facebook ka kritikuar sjelljen e opozitës dhe mungesën e solidaritetit, që edhe në ditën kur humbi jetën një efektiv i policisë në krye të detyrës nuk solidarizohet, por nxjerr vetëm llum.

“‎VajmedetPD që dhe ditën e rënies së punonjësit të policisë në krye të detyrës s’të nxjerr goja një fjalë solidariteti po veç llum e për lumë”shkruan kryeministri.

I menjëhershëm ka qenë edhe reagimi i kryetarit të PD-së, Lulzim Basha, i cili me anë të një deklarate shkruante se ai dhe partia që ai drejton u solidarizuan të parët me familjen dhe forcat e policisë mbrëmë sapo ngjarja ndodhi. “S’ka gjë më të turpshme të sulmosh opozitën ditën e rënies së oficerit në krye të detyrës”, shkruhet në deklaratën e kreu të PD-së.

Më tej Basha thotë se Rama, “tani që i plasin në fytyrë lidhjet kriminale të ministrit të Brendshëm mbrohet duke sulmuar opozitën dhe duke keqpërdorur me ligësi perverse të rënët në krye të detyrës. Marre e turp për këtë vajmedet Kryeministër”.

Komandanti i Forcave të Ndërhyrjes së Shpejtë të Shkodrës Simon Gjeta u qëllua për vdekje në krye të detyrës gjatë një aksioni nga Ruzhdi Arishta, i cili u ekzekutua pas 12 orëve nga policia në banesën e tij, pasi nuk pranoi që të dorëzohej.