Zbardhen të tjera detaje nga vrasja në Selitë

Zbardhen të tjera detaje nga vrasja e dyfishtë e ndodhur mëngjesin e së mërkurës në Selitë të Tiranës.

Flamur Ymeri, pronari i banesës që vrau dy të rinjtë, ka pasur konflikt me familjen e njërit prej viktimave.

Ymeri i kishte dhënë një shumë parash familjes së Ervin Shabës, me të cilën ishte komshi, duke qenë se ata ishin vetëm disa blloqe larg banesës së Ymerit.

Këto para Ymeri ia kishte dhënë me interes familjes së Shabës.

Për shkak se kjo shumë, sipas Ymerit nuk i ishte kthyer, ai ka vënë në përdorim Përmbarimin, që ka bllokuar shtëpinë e babait të Shabës.

Pas bllokimit të kësaj banese, Ymeri kishte nisur procedurat për kalimin e saj në pronësi të tij.

Kjo hedh dyshime se vrasja e dyfishtë nuk ka ndodhur për shkak grabitje.

Këtë gjë e mohon edhe babai i Ervin Shabës.

“Mua më ka vdekur djali 26 vjeç, çfarë prisni t’u them? Nuk është vrarë për grabitje, absolutisht jo. Nuk e di për çfarë ma kanë vrarë djalin”, ka thënë ai.

Dy prokurorë, ekspertë të policisë shkencore, si dhe oficerë të policisë gjyqësore kanë qëndruar rreth dy orë në shtëpinë e Ymerit. Ky i fundit ishte vetë personin që njoftoi policinë për ngjarjen e ndodhur, mëngjesin e së mërkurës rreth orës 08:00.

45-vjeçari telefonoi në numrin 129 në sallën operative të Policisë, duke deklaruar se në shtëpinë e tij gjenden dy trupa të pajetë, të cilët i kishte qëlluar me armë pasi kishin tentuar t’i vidhnin shtëpinë.