Vrasja e Kudret Saliajt, fëmijët dëshmojnë në gjykatë kundër nënës: Na rrahu që të mos tregonim për mesazhet që i pamë në telefon

Dhurata Saliaj dhe babai i saj, Mexhit Picari kanë dalë sot para gjykatës Penale të Tiranës ku është zhvilluar seanca gjyqësore në ngarkim të tyre dhe prokuroria ka kërkuar masën e sigurisë ‘arrest me burg’.

Sot para gjykatës, fëmijët e çiftit kanë rrëfyer për situatën që përjetonin sipas tyre prej muajsh me të ëmën.

Vajza e Kudretit dhe Dhuratës ka treguar në gjykatë edhe shenja të dhunës në trup dhe kërcënimet e njëpasnjëshme se në rast se do të tregonin për mesazhet që e ëma kishte me burra të tjerë, atëherë ajo do i mbyste me litar ose do i hidhte nga ballkoni.

E bija konfirmon akuzën se Dhurata Saliaj e kishte tradhtuar Kudretin dhe ky është shkaku kryesor i ndarjes.

“Mami ka rreth 3 muaj që vetëm na godet dhe na qëllon. Ajo mori në telefon gjyshen dhe e kërcënoi. I tha do t’ju vë njerëz mbrapa që tu vrasin. Mami na thoshte do t’ju mbyt me litar. Kisha parë disa mesazhe të mamit ndaj na kërcënonte. Ajo iu thoshte disa personave me mesazhe ‘të dua, kur do të takohemi’ – është shprehur e bija e mitur.

Ndërsa Dhurata Saliaj, në rrëfimin e saj në prokurori ka thënë se në ditën e vrasjes, i ati i ka kërkuar që të rrijë e qetë. Dhurata tregon se para se i ati të vriste Kudret Saliajn, ajo ka menduar se ai po shkonte në tualet.

“Mendova se babi u çua nga tavolina dhe ka shkuar në tualet. Dëgjova krismat dhe pastaj s’kuptova gjë. Ika në shtëpi me taksi, atje erdhi policia”, – ka pretenduar Dhurata për itinerarin e saj pas vrasjes.

Ndërkohë Mexhit Picari pretendon se e bija, Dhurata ka patur florinj, në banesën ku jetonte me Kudretin. Pasi viktima i ka nxjerrë rrobat dhe sendet personale, Mexhiti thotë se florinjtë nuk i janë kthyer të bijës.