Vrasja e marangozit në Sarandë, për një fjalë goje. Ja si u krye atentati

Një plan i mirëfilltë krimi ishte ai i organizuar nga 6 persona nga Gjormi i Krujës për të vrarë marangozin sarandjot, Edmond Thodhori. Sipas Gazetës Panorma, mbrëmjen e 8  korrikut, Gani dhe Keivi Hysa (xhaxha e nip) për shkaqe fare banale janë konfliktuar në rrugë me Edmond  Thodhorin dhe me A.S.

Për zgjidhjen e mëtejshme të këtij konflikti, Gani dhe Keivi Hysa, në rrugë  telefonike, kanë kërkuar ndihmën e vëllait të Keivit, Elion Hysa, i cili ndodhej  në Gjorm të Krujës. Ky i fundit ka vendosur t’i shkojë në ndihmë xhaxhait dhe  vëllait të tij duke marrë me vete për ndihmë edhe bashkëfshatarët e tij,  Ledi Hysa, Ylli Reçi dhe Ajman Zyba.

Gani Hysa ka mundur të pikasë mjetin e viktimës të parkuar në afërsi të vendit të njohur me emrin “Barracuda”. Rreth orës 01:00 të datës 10 korrik, ata kanë parë Edmond Thodhorin që ka hipur në mjet dhe të gjithë janë sulur me vrap duke e rrethuar.

Drejtuesi është frikësuar dhe tentoi t’i jepte indietro, duke goditur një vazo në trotuar.. Në çastin e ndalimit të automjetit njëri nga personat e grupit të ndodhur në anën e drejtuesit ka nxjerrë nga brezi një pistoletë dhe me të ka realizuar të shtënën në drejtim të shoferit.

Pas të shtënës, njëri prej tyre ka thënë: ‘Lëre se e vrave, futja vrapit’, dhe grupi prej pesë personash ka filluar në mënyrë të menjëhershme largimin nga vendi i ngjarjes, janë shprehur dëshmitarët, dëshmi e cila përkon edhe me pamjet e realizuara nga një kamera e një biznesi në vend.