Vrasjet në Vlorë, pronarët e resortit arrestohen për moskallëzim krimi

Dy pronarët e resortit në Vlorë, ku ndodhi të dielën vrasja e trefishtë, janë vënë në pranga. Saimir dhe Servet Qamo 25 dhe 54-vjeç , pronarë të resorit turistik në zonën e Kalasë pranë Ujit të Ftohtë, janë arrestuar nga policia e Vlorës për moskallëzim krimi.

“Në vijimësi të hetimeve të kryera në lidhje me ngjarjen e ndodhur më datë 28.07.2013 në plazhin e quajtur “KALAJA” ku mbetën të vrarë 3 persona, Grupi Hetimor i ngritur posaçërisht për këtë ngjarje ka bërë arrestimin në flagrancë edhe të shtetasve: Saimir Hiqmet Qamo, 25-vjec dhe Servet Hajredin Qamo, 54-vjeç, të dy banues në Vlorë, bashkëpronarë të plazhit të quajtur “Kalaja”, ku ndodhi ngjarja. Arrestimi i tyre u krye pasi megjithëse kishin detyrimin ligjor për të kallëzuar krimin e ndodhur në plazhin që kishin në pronësi nuk kanë e kryer një gjë të tillë, duke mos dhënë shpjegime.  Arrestimi i tyre u krye për veprën penale “Moskallëzimi i krimit” parashikuar nga neni 300 i Kodit Penal”, thuhet në deklaratën e policisë së Vlorës.

 Dëshmitari: Ngjarja në Vlorë, për shkak të një vajze

Vrasja e trefishtë në Vlorë erdhi pas konfliktit për një femër. Por asnjë nga tri viktimat nuk kishte të bënte me konfliktin mes vrasësit dhe një grupi djemsh nga Fieri, që i kishin ngacmuar motrën. Diana Ademi, Serdi Bajlozi dhe Sokol Isufaj u gjetën në vendin e gabuar , pikërisht në kohën kur 18-vjeçari Leo Osmeni  vendosi të hakmerrej. Viktimë mund të kishte qenë kushdo tjetër që gjendej atë ditë në plazh.

Një prej tyre është 21-vjeçari Justin Mërkuri. Ai ka qenë vetëm pak hapa larg breshërisë së automatikut, madje aq afër sa atë breshëri duket se e dëgjon akoma në kokë. Në një intervistë për GSH, ai rrëfen  tmerrin që ka përjetuar në ato momente, duke dhënë edhe detaje të tjera lidhur me masakrën e së dielës në zonën e Kalasë në Vlorë. “Ishte breshëri, por me sa mbaj mend dhe më është fiksuar në vesh, ishte breshëri me 2 ndalesa. Pra, autori qëlloi një herë me breshëri, më pas ndaloi dhe qëlloi përsëri”, – pohon Justini.

Sipas të riut, autori që ka qëlluar, ka pasur si shënjestër çadrën e disa djemve nga Fieri, të cilët po ngacmonin motrën e autorit. “Në fakt, autori jo se goditi pa shënjestër. Ai erdhi dhe qëndroi mbi 6 shkallët që zbret poshtë. Nga e goditura plumbat kanë kapur edhe bordurën, e cila bëri rikoshet, që vrau aksidentalisht edhe 2 viktimat e tjera”, thotë ai.

Masakra në Vlorë, policia: Viktimat nuk kishin asnjë konflikt me vrasësin, u vranë aksidentalisht

Njëri prej autorëve të krimit, Leo Osmeni, 18 vjeç, është konfliktuar me një grup djemsh nga Fieri. Policia po vijon hetimet për të zbardhur plotësisht dinamikën e krimit, por nga provat rezulton se viktimat janë goditur nga plumba rikoshetë. Ata nuk kishin asnjë njohje me autorin e krimit të rëndë.

“Falë një pune hetimore intensive, të mirëorganizuar dhe të pandërprerë është bërë e mundur që ditën e sotme mbas disa orësh nga ndodhja e ngjarjes të mund të identifikohet dhe arrestohet shtetasi: Leo Luan Osmeni, vjeç 18, banues në Vlorë, person me precedent penal, si dhe po punohet për identifikimin e bashkëpunëtorëve të tjerë. Sqarojmë se, nga veprimet paraprake hetimore ngjarja ka ndodhur pas një konflikti të çastit, për motive të dobëta midis autorit të dyshuar shtetasit Leo Osmani dhe disa shtetasve nga qyteti i Fierit. Gjithashtu sqarojmë se nga tërësia e veprimeve të hetimore të kryera si këqyrja e vendit të ngjarjes, këqyrja e viktimave nga një grup ekspertësh mjekoligjorë, dhe gjithë veprimtarisë hetimore paraprake ka rezultuar se 2 prej viktimave shtetasit S. B., vjeç 17 dhe Sokol Isufaj, vjeç 34, janë goditur nga plumba rikoshetë, si dhe asnjë prej 3 viktimave nuk ishin në konflikt me autorin dhe as kishin njohje me personat e tjerë të përfshirë në konflikt dhe se nuk kanë qenë objekt i sulmit kriminal”, thanë në një konferencë për shtyp drejtuesit e Prokurorisë dhe Policisë së Vlorës.

Vrasja e trefishtë në Vlorë, dëshmitarja rrëfen masakrën e së dielës në plazh

Tre pushues u ekzekutuan dje me kallashnikov në një resort turistik në bregdetin e Vlorës. Ngjarja ndodhi rreth orës 16:00, në plazhin e kalasë pranë Ujit të Ftohtë në Vlorë, në një zonë të mbipopulluar nga pushuesit.

Viktimat janë Sokol Isufaj, 34 vjeç, nga Kurjani i Roskovecit; Diana Ademi, 53 vjeçe, nga Vlora, dhe Serdi Bajlozi, 17 vjeç, nga Prrenjasi.

Policia e Vlorës tha se 3 viktimat nuk kishin lidhje me  njëri-tjetrin. Sipas uniformave blu, shënjestra ka qenë 34-vjeçari Isufajndërsa dy të tjerët janë vrarë aksidentalisht. Autori ka ardhur me një makinë dhe që nga shkallët ka nxjerrë kallashnikovin duke shtënë disa herë e më pas është larguar me shpejtësi. Autori është përshkruar nga dëshmitarët si një i ri rreth 25 vjeç, ezmer dhe me flokë të shkurtra. Tre të dyshuar janë shpallur në kërkim, por policia nuk ka bërë të ditur emrat e tyre.

Ndërkohë, në një intervistë për “Panorama”, E. M., 16 vjeç, e cila ndodhej në vendin e ngjarjes tregon sesi ndodhi krimi i trefishtë.

“Sapo isha ngritur nga shezlongu ku po rrija bashkë me kushërirën time dhe u drejtuam për nga deti. U ngritëm të laheshim. Kemi shpëtuar për fije edhe ne, mund të ishim edhe ne viktimat, sepse djali që u vra ishte fare pak metra  përpara këmbëve të mia. Në momentin e parë që nisën të shtënat askush nuk e kuptonte se ç’po ndodhte. Një adoleshenti i kaloi njëri plumb në fytyrë e më pas u shtri i vdekur në detin që u bë kuq. Unë u përpoqa ta ndihmoja në fakt pa e kuptuar as se si. Thërrita për ndihmë por nuk erdhi askush. Aq sa munda e nxora djalin drejt bregut ashtu siç ishte. Erdhën më pas njerëzit e ndihmës së shpejtë që u morën me ta”, tregon 16 vjeçarja.

Ajo tregon se i armatosuri ka zbritur poshtë në plazh.

“Po, qëllonte me breshëri, kush shpëtoi , shpëtoi. Pastaj aq zgjati, menjëherë sa mbaroi të gjithë u turrën drejt shkallëve  që të nxjerrin nga plazhi, duke shtyrë njeri-tjetrin. U bë kasaphanë ,nuk merrte vesh i pari të dytin, aq shumë shtynin e dhunonin njëri –tjetrin nga frika e lemeria”, pohon adoleshentja.

Ajo ka mundur që të shohë edhe dy viktimat e tjera dhe tregon se; “ burri tjetër që u vra ishte në këmbë  në kohën që u qëllua, ndoshta ishte drejtuar edhe ai për nga plazhi, por që ngeli aty. Ndërsa , gruaja ishte shtrirë në shezlong, ndoshta duke fjetur, dhe ashtu vdiq, pa lëvizur e pa kuptuar gjë, sepse mund ta kenë kapur plumbat e parë. Pashë  vetëm që i dolën  sytë vendit dhe ngeli aty për aq kohë sa u zbardh fare, sepse ambulance nuk erdhi menjëherë”.