Xhafaj – policisë: Godisni “bosët” e krimit, jo hallexhinjtë

Ministri i Brendshëm, Fatmir Xhafaj nga Shkodra dhe Lezha ku ishte i pranishëm në prezantimin e drejtuesve të rinj, kërkoi nga policia që të godasë bosët e krimit dhe jo të merret me hallexhinjtë.

Xhafaj ishte i prerë në porositë për Drejtoritë Vendore, ndërsa theksoi se lufta sapo ka nisur dhe kriminelët nuk mund të lëvizin të lirë, por të dërgohen para ligjit. Në nivel lokal, ministri u shpreh se në Shkodër përveç dy grupeve që janë goditur, janë edhe 4-5 grupe të tjera.

“Ju përgëzoj për dy operacionet fundit, por lufta jonë sapo ka nisur, nuk mund të lejojmë që kriminelët të jenë të lirë. Vëmendja e policisë do jetë e përqendruar në luftën ndaj krimit dhe jo ndaj njerëzve me halle. Policia është në shërbim të ligjit dhe mbrojtjes se çdo qytetari. Duhet të merremi me bosët e krimit, janë 4-5 grupe që duhen goditur nga policia”, deklaroi Xhafaj në prezantimin e drejtorit të ri në Shkodër, Vehbi Bushati.

Ndërsa në Lezhë është emëruar Ferdinand Mara.

I pranishëm në prezantimit e drejtuesve të Policisë së Shtetit në Shkodër dhe në Lezhë ishte edhe Ardi Veliu. Veliu u shpreh për mediat se “vendosëm prioritetet që do të ketë drejtoria e Shkodrës për këtë vit, janë objektiva që i ka policia e shtetit. Fokusi është të goditja e grupeve kriminale, prioriteti i dytë do të jetë goditja e personave që janë evidentuar si persona që kanë ushtruar aktivitetin e kultivimit të bimëve narkotike dhe minimizimin e sipërfaqes së kultivimit të bimëve narkotike. Në Shkodër kemi persona që ushtrojnë aktivitet kriminal, policia është duke i goditur. Nga drejtoria vendore janë goditur dy grupe, ndërkohë që është duke u punuar për goditjen e të tjerave. Për të goditur një grup kërkohet kohë, maturim dhe gjetja e provave”.

Përsa i përket Vettingut në polici, ai deklaroi se do të largohen të gjithë ata që kanë treguar shkallë të ulët profesionalizimi dhe që janë të implikuar.

o.j/dita