Tërhiqet një nga gjyqtarët që do të shqyrtonin çështjen e Ilir Xhakjas, të akuzuarit për vrasjen e kryekomisarit të Shijakut, Adem Tahiraj. Gjatë ditës së mërkurë pritej që Gjykata e Apelit në Durrës të merrte në shqyrtim ankimimin e Prokurorisë. Kjo e fundit kishte apeluar kundër fajësisë së dhënë për Xhakjan nga shkalla e parë për vrasjen e Qerim Malokut. Por një nga gjyqtarët e çështjes ka deklaruar se tashmë ai ka gjykuar një çështje lidhur me Xhakjan e si rrjedhojë është tërhequr. Një gjë e tillë ka bërë që seanca të shtyhet për në datën 27 nëntor.
Prokuroria e Durrësit ka kërkuar nga Gjykata e Apelit të rrëzojë vendimin e Gjykatës së Faktit që shpalli të pafajshëm Xhakjan për vrasjen e Qerim Malokut, ngjarje e ndodhur në vitin 1998. Nga ana e përfaqësuesit të akuzës ishte kërkuar që Xhakja të dënohej me 24 vjet burg. Por në shkurt trupi gjykues i drejtuar nga Neritan Tabaku vendosi t’i japë pafajësinë Xhakjas. Një gjë e tillë ka çuar edhe në lirimin e tij, ndërkohë që prokuroria e çoi çështjen në Apel.