Xhepa: Programi i PS ka ide racionale dhe të dobishme

Ish-deputeti i Partisë Demokratike, Selami Xhepa, shprehet se programi qeverisës i PS-së ka disa ide racionale dhe të dobishme, por mënyrat e arritjes janë të pamjaftueshme. Në një prononcim për “Panoramën”, Xhepa thotë se në programin e të majtës janë identifikuar qartë prioritetet madhore të vendit, të cilat ishin të tilla edhe për qeverisjen tetëvjeçare të demokratëve, pavarësisht nivelit të përmbushjes.

“Me një fjali të vetme do të thosha se programi ka objektiva të qarta të synuara, ka disa ide racionale dhe të dobishme, por mënyra e arritjes dhe burimet e disponueshme janë të pamjaftueshme. Programi identifikon drejt si prioritete madhore të vendit integrimin evropian, luftën ndaj korrupsionit, reformat ekonomike e administrative, përfshi atë territoriale. Këto kanë qenë edhe prioritetet e programit politik të PD-së gjatë dy mandateve të saj, pavarësisht nivelit të përmbushjes, që mund të jenë subjekt i një tjetër analize. Por dallimin filozofik midis dy qeverisjeve e shoh në artikulimin e qartë në programin e PD-së të nevojës për një ridimensionim të rolit të shtetit dhe raportit të tij me sundimin e forcave të tregut. Kjo është një qasje filozofikisht e re dhe e artikuluar për herë të parë në të majtën shqiptare, dhe që deri diku e ndeshim në qasjen që programi u bën disa reformave, siç janë ato të shëndetësisë, të taksimit dhe të mbrojtjes sociale”, thotë Xhepa.