Ekspertiza mjeko-ligjore: Deputeti Olldashi vdiq nga plaga në kokë

Shkaku i aksidentit të deputetit të PD-së dhe ish-ministrit Sokol Olldashi, mbetet tek pakujdesia në drejtimin e veturës luksoze tip “Benz”, me targa AA003HN, kurse si shkak i vdekjes është përcaktuar goditja e fortë në pjesën e kafkës së kokës, e cila është dëmtuar rëndë, aq sa ekspertët konstatuan mungesë të indit trunor dhe kockor. Goditja traumatiko-hemorragjike, pra plaga e thellë dhe derdhja e sasive të mëdha të gjakut, i ka sjellë humbjen e jetës 41-vjeçarit në timon, teksa mjeti i tij doli nga rruga Elbasan-Tiranë afër “Lapidarit të Krrabës”, në një kthesë 45 gradshe, me shpejtësi deri në 45 km në orë dhe pas zvarritjes në rrëpirë prej 10 metrash, është përmbysur në rrugën dytësore të fshatit. Pikërisht ky moment ka sjellë rënien me kokë të deputetit në pjesën ndarëse, kolonën mes xhamit dhe pjesës metalike, pasi nuk ka pasur as rripin e sigurimit. Ekspertiza zbuloi se nuk ka prezencë të alkoolit në gjak apo të substancave të tjera të jashtme dhe gjendja shëndetësore e deputetit ka qenë e mirë. Duke e bashkangjitur raportin e autopsisë mjeko-ligjore me atë të auto-teknikës së bërë disa ditë pas aksidentit, merr formë të plotë hetimi për ngjarjen e 20 nëntorit. Prokuroria mori dje në dorëzim edhe këtë raport, për të përpiluar konkluzionet përfundimtare.

Ekspertiza mjeko-ligjore

Ekspertiza mjeko-ligjore hedh dritë mbi shkaqet e vdekjes së ish-ministrit të Transporteve dhe Punëve Publike, Sokol Olldashi, në rrugën e kthimit nga Elbasani drejt kryeqytetit, rreth orës 21:15 të mbrëmjes së 20 nëntorit në Qafë-Krrabë. Sipas rezultateve të ekspertizës mjeko-ligjore, deputeti i PD-së Olldashi ka humbur jetën nga shoku traumatiko-hemorragjik, karakteristikë e aksidenteve automobilistike. Mësohet se gjatë ekspertizës nuk është konstatuar përdorim i lëndëve të huaja, dhe është konfirmuar fakti se deputeti Olldashi nuk ka qenë nën ndikimin alkoolit në momentin e aksidentit. “Nga akti i ekspertimit toksikologjiko-ligjor, rezulton se në gjakun e viktimës nuk u konstatua prania e alkoolit metilik”, thuhet në raport pas analizave të gjakut dhe atyre biologjike.
Koka e deputetit është goditur nga kolona e makinës, sipër dritares së pasagjerit. “Tek kufoma e shtetasit Sokol Olldashi u konstatua traumë e rëndë kafkotrunore, e karakterizuar nga thyerje të shumta të kockave të kokës, e shoqëruar me mungesë të indit kockor, kontuzion (shembje) e rëndë e trurit, e shoqëruar me mungesë të indit trunor. Plagë, dermishje dhe ekimoza të përshkruara”, shtohet më tej nga këqyrja për shkakun e vdekjes. Pra dëmtimi i pjesës së kokës ishte aq i rëndë sa ka prekur edhe trurin, ku ka dhe mungesë të pjesëve të vogla të tij. “Këto dëmtime janë shkaktuar me mjete të forta mbretëse, karakteristike edhe për traumat automobilistike. Shkaku i vdekjes së shtetasit Sokol Olldashi ka qenë shoku i rëndë traumatiko-hemorragjik”, mbyllet ky raport, duke e cilësuar zyrtarisht ngjarjen një aksident. Raporti i Institutit të Mjekësisë Ligjore iu dorëzua Prokurorisë, ndërsa mësohet se ekspertiza është kryer nga dy mjekë ligjorë, veprimet e të cilëve janë filmuar.

Raporti autoteknik

Përfundimisht shkaku i vdekjes mbetet plaga e rëndë në kokë e shkaktuar nga përplasja gjatë përmbysjes së mjetit me pjesën ndarëse metalike te dera. Kurse shkak i aksidentit përcaktohet pakujdesia e drejtuesit që udhëtonte i vetëm. Pak ditë pas ngjarjes doli raporti autoteknik, ku në të gjithë skenën dinamike përcaktohej se pakujdesia në drejtim, shpejtësia, mungesa e rripit të sigurimit, mungesa e barrierave mbrojtëse në kthesë, koha e keqe me shi dhe errësira, ishin shkaqet që sollën këtë aksident. Fushëpamja e kufizuar dhe mungesa e sinjalistikës ishin dy detaje të tjera që iu shtuan shkaqeve të aksidentit. Pati paqartësi rreth mënyrës se si ishte gjetur bosh tubi i alkoolit të frenave dhe si u derdh lëngu gjatë përmbysjes, pasi nuk kishte dëmtime. Po kështu mungonte tabela treguese në vendngjarje për vendin ku u derdh alkooli i frenave. Makina ka qenë në rregull dhe pa defekte.

Ekzaminimi Toksikologjik:

-Nga akti i ekspertimit toksikologjiko-ligjor, rezulton se në gjakun e viktimës nuk u konstatua prania e alkoolit metilik.

Konkluzioni Mjeko-Ligjor:

1. Tek kufoma e shtetasit Sokol Olldashi u konstatua traumë e rëndë kafkotrunore, e karakterizuar nga thyerje të shumta të kockave të kokës, e shoqëruar me mungesë të indit kockor, kontuzion (shembje) e rëndë e trurit, e shoqëruar me mungesë të indit trunor. Plagë, dermishje dhe ekimoza të përshkruara.

2. Këto dëmtime janë shkaktuar me mjete të forta mbretëse, karakteristike edhe për traumat automobilistike.

3. Shkaku i vdekjes së shtetasit Sokol Olldashi ka qenë shoku i rëndë traumatiko-hemorragjik.

Raporti Autoteknik:

– Shpejtësia e automjetit (neni 139 i Kodit Rrugor)
Në momentin e aksidentit, drejtuesi i mjetit po udhëtonte me shpejtësi 45 km/h. Sipas ekspertizës, në bazë të nenin 139 të Kodit Rrugor, më specifikisht, në paragrafin 3 të tij, thuhet se: “Veçanërisht, drejtuesi i mjetit duhet të rregullojë shpejtësinë në pjesët e rrugës me fushëpamje të kufizuar, në kthesa… në pjerrësi të forta, … në orët e natës, në rastet e fushëpamjes së pamjaftueshme për shkak të kushteve atmosferike ……”. Në kushte atmosferike të rënduara, siç ka qenë në momentin e aksidentit dhe në një kthesë të fortë, siç është konstatuar nga këqyrja e vendit të ngjarjes, automjeti duhet të lëvizte me shpejtësi më pak se 20 km/h.
– Mosrespektimi i sinjalistikës rrugore (neni 144 i Kodit Rrugor)
Nga këqyrja e vendit të ngjarjes është konstatuar se ekziston sinjalistika vertikale, e cila tregon drejtimin e kthesës në të majtë. Megjithatë, sipas ekspertëve, mungon sinjalistika horizontale.
– Përdorimi i rripit të sigurimit (neni 170 i Kodit Rrugor)
Nga këqyrja në vendngjarje dhe nga ekspertiza ka rezultuar se drejtuesi i mjetit nuk ka pasur të vendosur rripin e sigurimit.
Raporti i ekspertëve autoteknikë ka nxjerrë edhe një përfundim tjetër mbi gjendjen e pareteve anësorë të rrugës. Sipas materialit zyrtar, dorëzuar ditën e sotme në Prokurorinë e Rrethit Gjyqësor Tiranë, konstatohet se: “Nga enti pronar i rrugës nuk janë vendosur barrierat e sigurisë në pikat kritike, të cilat rrisin sigurinë e përdoruesve të rrugës në qarkullim”.

Prokuroria mori dëshmitë e shoferit, deputetit Cara, e banorëve 

Prokuroria e Tiranës ka bashkuar dje dy raportet mjeko-ligjore dhe atë autoteknik, për të sistemuar edhe dëshmitë e mbledhura në vendngjarje dhe provave të tjera fotografike. Në fund do përgatitet një konkluzion përfundimtar për hetimet e ngjarjes. Grupi hetimor ka marrë në pyetje gjatë këtyre ditëve, shoferin e deputetit, Bledar Begolli, që ka dhënë sqarime për telefonatën e kryer pak sekonda para aksidentit, deputetin Igli Cara, që ka dëshmuar se e priste në Tiranë për darkë të ndjerin koleg dhe se ishte ndër të parët që shkoi në vendngjarje, dhe disa punonjës policie e banorë të zonës, që kanë parë makinën pas aksidentit. Rezulton se të parët tek makina kanë shkuar banorët e fshatit, përfshi edhe biznesmenin Haki Sallufi, që ka lokalin pranë lapidarit. Më pas ka mbërritur deputeti Cara dhe shoferi i Olldashit dhe më tej Patrulla e policisë së tunelit dhe shërbimet e rendit. Nga hetimet rezulton se deputeti është gjetur i pajetë dhe ka qenë e kotë dhënia e ndihmës së parë.