Zbulohen policët që dekonspiruan aksionin kundër bandës së tritolit

Dy oficerë policie dekonspiruan hetimet e policisë dhe prokurorisë për bandën e tritolit, duke ndihmuar kushërinjtë Andon dhe Genis Mëhillaj të arratiseshin dhe Marion Mitron që të largohej në momentin e fundit, por që ky i fundit dështoi pasi u kap në Rinas. Burime zyrtare nga Policia e Shtetit konfirmuan lajmin, që gazeta DITA e publikoi disa ditë pas operacionit, ndërsa shtuan se tashmë janë identifikuar dhe dy oficerët e dyshuar që po hetohen në bashkëpunim me Prokurorinë e Krimeve të Rënda. Emrat e tyre u mbajtën të fshehtë si sekret hetimor, por mësohet se njëri është efektiv në Tiranë dhe tjetri nga Vlora. Hetimet kanë zbuluar se nëpërmjet telefonave të tyre celular janë lëshuar mesazhe në adresë të Mëhillajve dhe Mitros, me tekstet “Kujdes, largohu”, apo “Duhet të ikësh”.

Nuk jepen hollësi nga hetimet, por rastet janë ende nën investigim. Dje ka qenë në Prokurorinë e Përgjithshme për një takim edhe Zamir Shtylla, nëndrejtori i SHKB-së në Ministrinë e Brendshme, por që zyrtarisht organi i akuzës tha se “nuk ka qenë shkak hetimi për dy oficerët e policisë, por çështje të tjera bashkëpunimi mes institucioneve”. Gjithsesi burime zyrtare të policisë kanë pohuar për gazetën se prej mëse dy javësh bëhen hetime rreth policëve që kanë shpërndarë informacione në adresë të Mëhillajve dhe Mitros. Nëpërmjet kompanive celulare janë zbërthyer të gjitha telefonatat që kanë marrë të dyshuarit, ose që kanë bërë dhe u verifikuan numrat e policëve të dyshuar.

“Ne kemi dijeni se ka rrjedhur informacion në adresë të personave të dyshuar, por nuk bëhet fjalë për dështim operacioni. Kemi nisur si institucion hetime dhe madje kemi kërkuar nga prokuroria që të ndihmojë për t’i gjetur këta spiunë”, tha një zyrtar i lartë i Policisë së Shtetit. Por për momentin nuk është lëshuar asnjë urdhër-arresti në adresë të efektivëve, pasi çështja mbahet në sekret të plotë. Nuk përjashtohet që një nga temat e diskutuara mes Zamir Shtyllës, ish-drejtor i Hetimit në Prokurorinë e Përgjithshme në kohën e Ina Ramës, dhe përfaqësuesve të organit të akuzës te Krimet e Rënda, të kenë qenë edhe policët që spiunuan të dyshuarit që t’i shpëtonin nga arrestimi.

Mësohet se informacionet apo mesazhet u janë dërguar 2-3 ditë para se të kryhej operacioni i arrestimit. Pra menjëherë pas arrestimit të Julian Sinanajt si vrasës me pagesë i grupit dhe Ndriçim Gjokonës, të penduarit, si ndihmës. Emrat e Andon dhe Genis Mëhillaj e Marion Mitros, janë dërguar në të gjitha pikat kufitare dhe dy prej policëve i kanë informuar që të largoheshin. Por ndryshe nga Mëhillajt, të cilët nuk tentuan të dilnin nga pikat kufitare, ish-inspektori i bashkisë Mitro, u përpoq të arratisej nga Rinasi, por u arrestua.

 Arrestimi i Mitros dhe Mëhillajt dhe porositë e atentateve

Marion Mitro u arrestua më 29 janar në aeroportin e Rinasit duke u arratisur jashtë vendit. Ish-inspektori i bashkisë Vlorë dyshohet se është porositësi tek Julian Sinani, për vënien e eksplozivit në automjetin e prefektit të Vlorës, Besnik Dervishi. Kurse Andon Mëhillaj, tashmë i ndaluar pas vetëdorëzimit javën e kaluar, së bashku me kushëririn Genis Mëhillaj, në kërkim, janë të dyshuar si sekserë në pagesën që kanë bërë për Julian Sinanaj, që ky i fundit të ekzekutonte Sokol Veizin në 2012 për konflikt pronësie dhe biznesmenin Agron Çela. Gjithashtu kanë porositur atentatet ndaj ish-deputetit Ardian Kollozi, biznesmenit E. B., dy herë dhe ndërmjetës te biznesmeni Ilir Karçini për vrasjen e sipërmarrësit Piro Bare në Tiranë, më 25 janar, ditën kur u krye operacioni.

Të arrestuarit e grupit të tritolit:

Julian Sinanaj, 31 vjeç, vrasësi

Ndriçim Gjokona, 30 vjeç, ndihmësi

Andon (Erion) Mëhillaj, 39 vjeç, porositësi

Marion Mitro, 42 vjeç, porositësi

Ilir Karçini, biznesmen, porositës

I shpallur në kërkim:

Genis Mëhillaj, 43 vjeç, porositësi

Zbulohet grabitja e taksistit të pestë, nga 23-vjeçari që i shiti celularin Sinanajt

Zbulohet grabitja e një tjetër taksisti nga i dyshuari Redon Asllanaj, 23 vjeç, i cili u arrestua javën e kaluar për ngjarjet në seri dhe si personi që i ka shitur një nga celularët e grabitur killerit Julian Sinanaj për të bërë bombën që iu vendos prefektit Besnik Dervishi më 13 dhjetor.

Burime zyrtare nga policia e Tiranës thanë dje se i riu nga Berati, por banues në kryeqytet, i arrestuar prej datës 14 shkurt, akuzohet se më 28 janar të këtij viti, rreth orës 17:30, në Allias, ka vjedhur me dhunë taksistin Sokol H., 34 vjeç, i cili punon me automjetin me targa AA021T, duke i marrë një shumë prej 8000 lekësh. Asllanaj akuzohet edhe për 4 grabitje të tjera taksistësh në muajt janar-shkurt të këtij viti, ndërsa një tjetër ngjarje ka ndodhur në dhjetor ndaj një taksisti të cilit i ka marrë edhe telefonin “Samsung” që dyshohet se ia shiti Sinanajt. Burime zyrtare të policisë thanë se 23-vjeçari mund të ketë kryer më shumë grabitje të taksistëve nga ato që janë zbuluar dhe hetimet po vijojnë intensivisht. Sipas hetimeve të deritanishme, Asllanaj pasi pajtonte taksi për të shkuar në periferi të Tiranës, nën kërcënimin e armës i grabiste duke u marrë paratë dhe sendet personale.