Zbulim! Ja “Pikat e Planit të Mirë” të Doktorit për armët!

Shqipëria vazhdon të jetë ende e tronditur nga thirrja partizane e ish të parit të vendit, për të rrokur armët.

Gojët e liga thonë se Sali Berisha kërkon thjesht të krijojë kaos në vend, por kjo nuk është aspak e vërtetë.

Sipas një plani i cili u përcaktua nga ekspertët si plan i mirë, këtu nuk ka vend për panik.

Pikat e Planit të Mirë sigurojnë që nga mbajtja e paligjshme e armëve nuk do të ketë asnjë kazualitet.

1-Në ambientet e shtëpisë, arma do të mbahet e mbyllur në sirtar, kurse municionet në një sirtar tjetër. Sirtarët duhet të jenë të ndarë nëpër dhoma të ndryshme, p.sh: Arma do të mbahet në dhomën e gjumit, kurse municionet në dhomën e ndenies.

Në rast sulmi, vjedhje apo kanosje për vrasje, i kërkohet keqbërësit të bëjë durim sa të bëhet e mundur marrja e municioneve nga dhoma tjetër dhe pastaj të procedohet normal duke sulmuar keqbërësin.

2-Për fëmijët është kategorikisht e ndaluar mbajtja e armëve mbi kalibrin 2,7 mm. Nuk ka lezet.

3-Armët nuk do të lejohen të merren me vehte në raste vizitash jashtë kufirit. Arma do lihet në doganë, ku edhe do të tërhiqet në momentin e rikthimit.

4-Çdo familje do të pajiset me një manual përdorimi për armët, ku do të shpjegohet shkurt përdorimi i tyre, pasi dihet që mësuesi më i mirë është eksperienca në terren.

5-Në rast plagosjeje, personi të mos nxitohet dhe të kërkojë ndihmë mjekësore, apo të paraqitet vetë në spital. Dihet që plumbi del me plumb, për këtë janë armët, të mos i lodhim kot këmishat blu.

6-Mbajtja e armës është përgjegjësi personale, për çfarëdo të papritur apo aksident, fajin e keni vetë.

******

SHËN.RED. / Gojët e Liga është një rubrikë satirike në DITA. Çdo përputhje me ngjarje apo rrethana reale është krejt rastësi