Z.Minxhozi, fitorja e Obamës, është zgjedhja e duhur për botën?
Mendoj se është zgjedhja më e mençur për botën. Fakti që një masë dërrmuese e europianëve, kinezë dhe rusëve e afrikanëve preferonin presidentin aktual, tregon se në nivel planetar Obama është një lider politik më i pranueshëm, njerëzor dhe i prirur drejt kompromisit. Deklaratat e forta të Romney-t për Kinën dhe Iranin apo Rusinë, duket se kanë lënë shenjën tek vendet e interesuara direkt për zgjedhjet amerikane. Por mesa shihet edhe Europa vijon të ketë një preferencë speciale për demokratët amerikanë, duke mos i preferuar republikanët, të cilët e shohin kontinentin e vjetër si një relike sociale dhe si një shembull të keq, për të mos u kopjuar. Me Romney-n do të kishim një stinë diplomatike botërore me shumë të panjohura brenda, kur se Obama ofron më shumë garanci në këtë drejtim.
Po për Shqipërinë?
Për Shqipërinë zgjedhjet amerikane, ose më saktë fituesi i tyre, s’ka asnjë rëndësi relevante. Amerika nuk ka një politikë të sajën për Shqipërinë politike, pra për shtetin zyrtar ku jetojnë shqiptarët. Ajo ka një politikë të sajën për faktorin shqiptar, çka është diçka e ndryshme. Dhe kjo politikë amerikane në drejtim të shqiptarëve në rajon, nuk shfaq diferenca. Republikanë dhe demokratë i shohin njëlloj shqiptarët në Ballkan. Sa për vendin tonë, siç e theksova, nuk do të kishte ndonjë ndryshim edhe nëse do të kishte fituar Mitt Romney.