Zgjedhjet vendore, Basha “kurbani” i dinastisë Berisha në PD?

Kur na ndajnë vetën tre muaj nga afati përfundimtar që partitë politike kanë të drejtë të propozojnë kandidaturat e tyre për zgjedhjet lokale të 21 qershorit, duket se Lulzim Basha do të shkojë drejt rikandidimit për Bashkinë më të madhe të vendit, atë të Tiranës. Më shumë se një dëshirë e tij për të rikandiduar për të qenë sërish qytetari nr. 1 i kryeqytetit, Basha duket se e ka detyrim për të pranuar që t’i nënshtrohet sërish emocioneve të garës. Por ndryshe nga katër vite më parë, kur qeverinë e kishte e djathta, ç’ka i mundësoi të rrëmbente fitoren ndaj Ramës në tavolinën e KQZ-së e të Kolegjit Zgjedhor, kësaj radhe Basha duhet të mbështetet vetëm tek votat që do të marrë në zgjedhje.

Burime nga PD konfirmojnë për “Ditën”, se pavarësisht emrave që përfliten si kandidatë të mundshëm për Bashkinë e Tiranës, ajo e kryetarit Lulzim Basha vijon që të mbetet më e sigurta.  Ndonëse e shprehur në formën e një dëshire, edhe ish-kryetari i kësaj force, i cili vijon që të mbetet edhe drejtuesi “de-facto”, i kërkoi Bashës që të rikandidojë.

Lidhur me rikandidimin apo jo të kreut aktual të Bashkisë së Tiranës, Lulzim Basha, (njëkohësisht edhe kreu i PD-së), Berisha tha se nëse do të ketë zgjedhje, atëherë kandidatura e Bashës është më e mirë. “Nëse janë zgjedhje lokale Basha është kandidatura më e mirë. Ai nisi, bëri projektet, ky (Edi Rama) e bllokon. Dy mijë qytetarë të Tiranës do merrnin rroga në bulevardin e Tiranës”, deklaroi Berisha në një intervistë televizive për “News24”.

Në të njëjtën linjë shprehet edhe dhëndri i Berishës, i cili po projektohet si pasardhësi i ish-kreut të PD. Edhe Jamarbër Malltezi deklaron se Basha duhet të rikandidojë për Bashkinë e Tiranës përballë kandidatit të propozuar nga e majta. I pyetur nëse ai vetë do të synonte Bashkinë e Tiranës, Malltezi do të shprehej se kryeqyteti e ka kryetarin dhe se Basha duhet të rikandidojë.

Deri më tani vetë Basha nuk e ka deklaruar publikisht se nuk do të rikandidojë për zgjedhjet lokale në Bashkinë e Tiranës, ndërsa kryetari i grupit parlamentar demokrat, Edi Paloka, gjatë një interviste në emisionin “Fakt” në UTV në prill 2014, do të bënte të ditur mos kandidimin e Bashës. “Është vendosur që Basha nuk do të kandidojë më për Bashkinë e Tiranës”, do të shprehej Paloka.

Por ky ndryshim drastik i qëndrimit të demokratëve për kandidaturën e PD-së, duket se është edhe një vendimmarrje e familjes “Berisha” për të katapultuar pas zgjedhjeve vendore të 21 qershorit një prej pjesëtarëve të familjes.

“Të mirat e humbjes”

Një humbje e PD-së në zgjedhjet vendore të 21 qershorit do të konfirmonte edhe njëherë atë që thuhet nën zë në radhët e demokratëve, se Basha nuk arrin që të drejtojë përpara demokratët. Pakënaqësitë në radhët e demokratëve filluan që me komandimin e Bashës në krye të PD-së. Menjëherë Topalli, Patozi e shumë figura të tjera kanë shprehur kritika ndaj tij. Rezultati i dobët në zgjedhje do të zgjonte zërat kundër Bashës, ndërsa ky do të ishte një moment tepër i favorshëm për Berishën, që të katapultonte një prej anëtarëve të familjes së tij në krye të PD-së. Jamarbër Malltezi është edhe njeriu më afër Partisë Demokratike për momentin, se sa Argita Malltezi, e cila ndonëse ka pasur dijeni për të gjitha lëvizjet politike të babait të saj Berisha, deri më tani ka qëndruar në hije dhe nuk është  bërë pjesë e strukturave drejtuese të PD-së.

Jamarbër Malltezi do ta kishte mjaft të lehtë marrjen e drejtimit të PD-së në rast se Basha do të tërhiqej nga humbja në zgjedhjet vendore, pasi vjehrri i tij vijon që të ketë ndikim tepër të fortë në këtë forcë. Deputetët janë të zgjedhur nga lista e hartuar nga Berisha, ashtu sikurse edhe një pjesë e anëtarëve të Këshillit Kombëtar të PD-së.

****

Jamarbër Malltezi, dhëndri biologjik dhe politik i PD-së

Siç do të shprehej pak ditë më parë vetë Malltezi, ai do të bëhej pjesë e strukturave të PD-së së bashku me bashkëshorten e tij (vajza e
Berishës), që në dhjetorin e ’90-ës. Madje dhëndri i Berishës do të dekorohej nga Bujar Nishani në 20 shkurt 2013 me “Medaljen e Mirënjohjes” me motivacionin: “Për përkushtimin aktiv në Lëvizjen Studentore të Dhjetorit 1990, për veprimtarinë në lartësimin e idealeve të saj dhe për vetëmohimin e treguar në pjesëmarrjen në grevën heroike të urisë në Qytetin Studenti në shkurt 1991, vendimtare në përmbysjen e sistemit diktatorial komunist”. Pas dorëheqjes së Berishës, Jamarbër Malltezi shtoi përpjekjet e tij për t’u bërë pjesë e strukturave drejtuese të PD-së. Ai do të ishte një nga 40 koordinatorët e PD-së për ristrukturimin e kësaj force pas humbjes së zgjedhjeve të 23 qershorit. Si për ironi, zona që do të mbulonte Malltezi do të ishte e njëjta zonë ku voton edhe Lulzim Basha. Zgjedhja e tij nuk duket e rastësishme, pasi i është dhënë një nga zonat më të lehta për riorganizimin e PD-së. Njësia 8, e cila shtrihet tek Shkolla e Kuqe, është bastion i së djathtës dhe ku janë familje përgjithësisht autoktone të Tiranës. Me përfundimin e këtij procesi, Jamarbër Malltezi do të ishte një nga emrat më të votuar për Këshillin Kombëtar, e më pas do të votohej edhe si kryetar i Departamentit të Ambientit, Pyjeve dhe Turizmit.

***

Parashikimi i Prof. Servet Pëllumbit për rikthimin e Berishës në krye të PD-së

Në një intervistë për DITA-n vitin e kaluar, një nga figurat kryesore të së majtës shqiptare, ish-Kryetari i Kuvendit dhe ish-nënkryetari i PS-së, Servet Pëllumbi, “parashikoi” rikthimin e Berishës në krye të PD-së.

Ja çfarë ka thënë konkretisht Prof. Pëllumbi në intervistën për ‘DITA-n’ më 14 janar 2014:

“Pa hyrë në histori, në përgjigje të pyetjes tuaj po theksoj: Së pari, gjatë gjithë kohës që nga 23 qershori dhe deri sot, Berisha nuk ka arritur të përshtatet me rotacionin e kërkuar nga vota masive e popullit për ndryshime të thella dhe largimin e “regjimit Berisha”. Ai e quajti këtë “mosmirënjohje të popullit”, “mashtrim të elektoratit nga Edi Rama”, por jo dështim të tij, prandaj dhe bllokoi analizën e humbjes së PD-së .  Së dyti, Berisha edhe pse inskenoi një dorëheqje formale dhe një “zgjedhje”po kaq formale të një kryetari të ri për PD-në e mbetur, vazhdon të sillet si kryetar de facto, dominon grupin parlamentar të PD-së, që vetëm dëgjon e duartroket Berishën pas çdo fjale dhe replike në Kuvend; jep konferenca shtypi njëlloj si dikur; pret e përcjell në zyrën e tij luksoze militantë e servilë të niveleve të ndryshme dhe lëshon prej aty, apo dhe përmes rrjeteve sociale “direktiva”, thirrje e porosi duke mbajtur ndezur frymën e kultit për vetveten. Mendoj, se brenda vitit të ardhshëm me inskenime kërkesash “këmbëngulëse të bazës”, Berisha do të rikthehet në krye të PD-së edhe de jure! Mbase mund të shfrytëzojë për këtë qëllim edhe fushatën e zgjedhjeve në PD të shpallur këto ditë nga kryetari de jure L. Basha.”

***

Lista e kandidatëve

Brenda 2 majit, partitë politike duhet të kenë përgatitur listat e kandidatëve që do të zgjidhen për kryetar bashkie. Në planin e punës që ka përgatitur Komisioni Qendror i Zgjedhjeve dhe që pritet të miratohet nesër, është parashikuar që jo më vonë se 2 maj 2015, bazuar në nenin 67 pikat 2,4,5, 6 Neni, 68, pika 2,Neni 72 dhe Neni 73, KQZ do të miratojë dhe aktin për regjistrimin e kandidatëve për kryetar në ato bashki që zgjedhjet administrohen nga më shumë se një KZAZ. Rrjedhimisht, janë që të 66 bashkitë. Ndërsa jo më vonë se 11 prill 2015, KQZ do të kryejë regjistrimin e partive politike, si subjekt zgjedhor në KQZ, ndërsa jo më vonë se 21 prill 2015, bazuar në nenin 65, pika 1, KQZ do të miratojë regjistrimin e koalicioneve zgjedhore.