Zoti Kryeministër, ku do i gjeni 42 milionë euro?

Kryeministri aktual i vendit, në një tubim të djeshëm, deklaroi “Unë u premtoj të gjithë punonjësve të administratës rrogën e 13-të”. Mos duhet të pickojmë veten, për të kuptuar se nuk jemi në ëndërr? Punonjësit e administratës publike janë sot 128 mijë vetë. Nëse shumëzojmë këtë numër me rreth 350 euro si pagë mesatare në muaj për ta, i bie një fond rreth 42 milionë euro për dhjetorin, kur jepet paga e 13-të. Ku do t’i gjejë paratë qeveria jonë? Në tre muajt e parë të vitit (janar-mars 2013) kemi mbledhur 30 milionë euro më pak nga plani. Janë vetë shifrat e Ministrisë së Financave që e vërtetojnë këtë. Të ardhurat buxhetore kapën shifrën 75.5 miliardë lekë, nga 79.6 miliardë lekë që ishin planifikuar. Me një mosrealizim të thekshëm prej 4.2 miliardë lekësh. Borxhi publik ka arritur në masë të tillë, sa me të ardhurat publike nuk mbulohen pagimi i interesave të tij dhe i principalit(vetë borxhit). Gjendja në dy muajt e tjerë(prill-maj 2013) jo vetëm nuk u përmirësua, por u rëndua më tej. Kolapsi po i avitet ekonomisë sonë si një ortek fatal. Kemi pasiguri në investime, pritshmëri të ulët për konsumin, ulje të ndjeshme të kapacitetit prodhues të biznesit, papunësi dhe kthim tronditës të emigrantëve nga Greqia e Italia. Kemi me qindra biznese në prag falimentimi, të bllokuar dhe gati rrënuar nga gjobat e larta, pamundësia e kthimit të kredive që kanë marrë dhe përjashtimi arbitrar nga pjesëmarrja nëpër tendera publikë, vetëm pse nuk janë të favorizuar të Qeverisë(me fjalë të tjera, nuk janë “kollitur” në mbledhjen e fondeve për PD-në apo në favore personale ndaj dinjitarëve të lartë të Shtetit!). Nën ethet e pragzgjedhjeve të përgjithshme, këto muajt e fundit qeveria miratoi një varg ligjesh që përjashtonin disa kategori biznesesh dhe rroga të ulta nga taksat. Me një rendje ekonomi-vrasëse për të siguruar vota tek shqiptarët. Duket sikur qeveria e sotme po u premton atyre diellin, por në fakt kjo politikë financiare e fiskale pa bosht rrezikon të paralizojë ekonominë. Vetëm pasojat e lehtësirave të fundit fiskale mund të bëjnë që gjashtemujorit te dyte të këtij viti t’i mungojnë Buxhetit te Shtetit mbi 110 milionë euro. Ekonomia vazhdon të përshpejtojë rënien drejt nivelit zero të rritjes ekonomike, kontrolli mbi borxhin dhe defiçitin ka humbur, kërkesa e brendshme konsumatore vazhdon të ulet. Nga ana tjetër, ritmet e kreditimit të ekonomisë nga sistemi bankar po bien, ndërsa kreditë e këqia po asfiksojnë likuiditetin. Gjysma e borxhit tonë publik si shtet është me afat njëvjeçar dhe shlyerja e tij do të marrë një pjesë të mirë të të ardhurave buxhetore në gjysmën e dytë të vitit. Në nëntor 2013, i bie të marrim borxh për të mbushur një premtim elektoral, i cili në këtë kohë e kushte, i ngjan shprehjes së Mbretëreshës Maria Antonetë kur i thanë se njerëzit po protestonin se nuk kishin ç’të ushqeheshin:”Nuk kanë bukë, të hanë biskota!”. Kështu dhe Kryeministri demokrat. Sipas vetë INSTAT, kemi në dy vitet e fundit rreth 50 mijë të papunë të rinj. Me dhjetra mijëra familje shqiptarë ushqehen me listë borxhesh nëpër ushqimoret, kurse Berisha premton rrogë të 13-të! Ky premtim nën mendësinë “premto, premto, se diçka do të besohet”, vetëm në këtë vit kaq të vështirë dhe me rezultate ekonomike paraprake kaq mjerane, që nuk mund kurrsesi të bëhet. Asnjë forcë politike e përgjegjshme nuk do t’ja kishte lejuar vetes këtë premtim zgjedhor, në kushtet e tanishme, por Kryeministri i sotëm po.