Zoti Rama, qeverisni!

 E nderuara “DITA” jonë! Të nderuar redaktorë! I shtrenjti Adrian: Lutemi, trajtoni sa ta shikoni ju të arsyeshme për sa po ju dërgoj. U dëgjua nga Patozi, që këtë mazhorancë (shumicë) që ka Partia Socialiste në Kuvendin e Shqipërisë do ta lakmonte e gjithë bota demokratike! Ne nga anët tona fjalën shumicë e quajmë të madhe, dhe pakicë e quajmë të vogël. Pra i madhi duhet të kujdeset për të voglin. Si rregull i vogli duhet t’i bindet të madhit se prandaj është i vogël. Nëse i jep ushqim dhe ai e hedh poshtë, a nuk e ka hak shuplakën në surrat? PD-ja prej 23 Qershorit 2013 është e vogël, sepse kështu vendosi populli. Por me sa duket akoma nuk e ka kuptuar se çfarë ka ndodhur. Ka një thënie nga të anëve tona. Ne i themi budallait “ha bukë e lësho lopët”, në mënyrë që edhe ai të bëjë një punë për të justifikuar jetesën, se për ndryshe rrezikon të mos ushqehet. Me çfarë po shohim, në Kuvendin e Shqipërisë i vogli është bërë i mërzitshëm. E dimë që konsensusi është i mirë, edhe në Luftën e Dytë Botërore është gjetur konsensus. Por mos mbani shpresë për konsensus me Partinë Demokratike, se nuk do ta keni kurrë sa kohë të jetë Berisha aty. I themi mazhorancës dhe Edi Ramës që të drejtojë me votën që ka marrë. Populli nuk ka më durim për llafe. Nuk mundet që një pakicë të vazhdojë t’i fusë Shqipërisë shkopinj në rrota si dikur kur ishte në qeverisje. Për ne si popull, fjala e Patozit është domethënëse sepse ai i thotë qeverisë të vazhdojë të bëjë detyrat me votën që ka marrë. Realizoni premtimet, në të kundërtën, me rastin më të parë ndëshkimi vjen shpejt edhe për Partinë Socialiste dhe koalicionin Rilindja.

Letër e nënshkruar

Pjetër Bubaj, Rubik