Portieri kuqezi është vlerësuar edhe dje, në fitoren ndaj Empolit, si ndër më të mirët në fushë për bardhekaltërit, pas gjysmëfinales së Kupës: “Ndihem gati dhe jam i qetë, këtë e mësova kur luaja tek Kalmari”
Në brenda pak ditësh disa ndërhyrje vendimtare dhe shpëtimtare për Lacion, duke zëvendësuar më së miri Federiko Marketin, portierin titullar të bardhekaltërve, që ka pësuar një frakturë në hundë pas përplasjes me Canën në stërvitjen e ditës së enjte. Po flasim për Etrit Berishën, portierin e Kombëtares kuqezi, që pas sfidës në gjysmëfinalen e kthimit të Kupës së Italisë, në “San Paolo”, dje ka rezultuar i pakalueshëm edhe me Empolin, në suksesin 4-0. Pas ndeshjes, ai është ndalur nga mediat dhe për ato laciale ka dhënë përshtypjet e tij.
– Ndeshja e dytë radhazi që e bëni shumë mirë…
– Jam i përgatitur për të ndihmuar shokët e skuadrës. Kam bërë disa ndërhyrje të rëndësishme. Përtej faktit nëse bëj një gabim apo nëse shpëtoj rezultatin, ndeshja zgjat 90 minuta dhe duhet të qëndrosh i qetë dhe i përqëndruar. Eksperienca tek Kaljari më ka ndihmuar shumë, sepse edhe ata janë shumë më të qetë se sa këtu (Itali)…
– Kush ishte pritja jotë më e bukur?
– Ajo e Hamsikut të mërkurën në Kupën e Italisë. E preka, por gjyqtari nuk akordoi goditje nga këndi
– Luliç vuri bast një darkë…
– Po, do të më duhet që t’ia ofroj unë. Ndërhyrja e tij në Kupën e Italisë vlen sa një gol i shënuar, edhe pse Luliç e bëri edhe atë gjë. Me të vërtetë që bëri një mrekulli
– Kundër Juventusit s’do të jetë aspak e lehtë…
– Ne jemi të përqëndruar dhe mendojmë që mund të luajmë ashtu si bëjmë gjithmonë, duke provuar të marrim edhe tri pikët