Gjashtë firma piramidale janë dërguar në gjykatë, me kërkesën për shpalljen e falimentit zyrtar. Kryeadministratori Bajram Malaj ka kërkuar falimentimin zyrtar të piramidave, 16 pas trazirave që patën si origjinë pikërisht mashtrimin që këto skema u bënë shqiptarëve. Gazeta Shqiptarja.com shkruan sot se firmat Sude, Global Foods, Arsed, Univers, Nahlel dhe Beno janë në thelb të kërkesës së përfaqësuesit të qeverisë për t’ia kaluar në kompetencë pushtetit gjyqësor mbylljen e këtyre firmave.
Ligji parashikon që nëse gjykata i shpall firmat në proces falimenti, ajo duhet të caktojë një administrator të pavarur që duhet të likuidojë detyrimet e mbetura. Administratori caktohet kësaj radhe nga gjykata dhe jo ekzekutivi, por kjo nuk i shton shpresat për likuidim të shumave që nëpërmjet mashtrimit iu morën shqiptarëve vite më parë.
Në këtë mënyrë, përmbyllet dosja e piramidave, duke i mbyllur rrugën çdo kërkese të mundshme të qytetarëve drejtuar qeverisë për shlyerjen e borxheve që u kanë këto firma. Mesa duket, kjo është një lëvizje e Berishës, për të larë duart me një problem që u kushtoi jo pak shqiptarëve në vitin 1997.