Kryeministri Berisha ka zhvilluar sot një takim me gratë dhe vajzat e Lidhjes Demokratike të Gruas Shqiptare (LDGSH). Berisha ka vlerësuar kontributin e grave, të cilat ai tha se i ka pasur bashkëpunëtoret më të mira që në vitin e parë si president i vendit.
“Mirënjohje për qindra e mijëra gra e vajza, nëna e motra, që me sakrificë e përkushtim, kanë bërë gjithçka për fitoren e Partisë Demokratike në këto 22 vjet. Ato kanë bërë gjithçka për shndërrimin në realitet të programit transformues epokal të kësaj partie. Kanë qenë në distancë forca më e fuqishme mbështetëse e Partisë Demokratike, që në vitin e parë të themelimit e deri në ditët e sotme”, tha Berisha.
Berisha falënderoi gratë, të cilat i konsideroi si bashkëpunëtore në realizimin e reformave për të çuar vendin përpara. “Të gjitha fushatat elektorale të fituara nga PD janë fituar para së gjithash si pasojë e mbështetjes së fuqishme të grave dhe të rinjve të Shqipërisë. Të gjitha reformat e kryera gjatë këtyre viteve, unë kam pasur fatin të kem bashkëpunëtore të shkëlqyera. Të cilat me ndershmëri, përkushtim e mençuri kanë dhënë një kontribut të jashtëzakonshëm”, tha kreu i PD-së.