Një gozhdë “bujare” për dosjen e Lulit

Ish-drejtuesi i Inspektoriatit Ndërtimor në kohën e demokratëve Gjergj Bojaxhi duket se është vendosur në shënjestër nga kreu i PD-së Lulzim Basha. Bojaxhi, është zyrtari i parë (për më tepër demokrat) që denoncoi pallatin e famshëm të vjehrrit të Lulzim Bashës në Vlorë. Tashmë, vjehrri i Bashës, shtetasi Xhaferr Isufi, është nën hetim dhe dyshohet se është implikuar në një ndër manipulimet më spektakolare të dokumenteve në hipotekë, përfshirë falsifikim të vendimeve gjyqësore me pasojë “privatizimin e detit”. Një njoftim i djeshëm i Kontrollit të Lartë të Shtetit jep sinjale se ndaj Bojaxhiut mund të ketë nisur një hetim institucional pas “dhimbjeve të kokës” që i ka shkaktuar vjehrrit të kreut të PD-së.

KLSH dhe dy fajtorë anonimë

Pasditen e djeshme, Kontrolli i Lartë i Shtetit sjell një njoftim interesant. Bënte me dije opinionin publik se nga një kontroll i ushtruar në Inspektoriatin Ndërtimor Kombëtar(INUK) në dokumentacionin e këtij inspektorati për periudhën kohore 2010-2012, ishin vërejtur një sërë shkeljesh dhe dy ish-drejtues të lartë të Inspektoriatit, ishin kallëzuar në prokurorinë e Tiranës. Në njoftimin e KLSH-së kishte një problem, emrat e dy ish-zyrtarëve të kallëzuar mungonin. Kjo praktikë bënte përjashtim nga rutina e njoftimeve të KLSH-së e cila sa herë që sinjalizon zyrtarë të dyshuar dhe të kallëzuar në prokurori për shkelje, përcakton qartë identitetin e tyre. Pas kësaj mangësie të vërejtur, DITA kontaktoi në rrugë zyrtare me KLSH-në por në rrugë zyrtare nga ky institucion u tha se emrat nuk mund të jepeshin. Më pas DITA konsultoi burime kompetente në KLSH duke siguruar dhe emrat e dy ish-zyrtarëve të cilët janë Gjergj Bojaxhiu dhe Gëzim Dauti të kallëzuar në prokurori për shkelje. Emrat e Bojaxhiut dhe të Dautit u konfirmuan dhe nga një burim i dytë brenda KLSH-së. Në tentativë për të mësuar më tepër mbi implikimin e zotit Bojaxhiu në këtë histori, kontaktuam me të, por duket se ai vetë u informua prej gazetës për këtë kallëzim të KLSH-së ndaj tij. “Jeni të parët që po më thoni dhe nëse nuk e keni marrë zyrtarisht nga KLSH-ja emrin tim ju lutem mos publikoni pa konfirmuar sepse mund të ndodhë që e keni marrë gabimisht. KLSH-ja vepron në bazë të një procedure standarde dhe si pjesë e kësaj procedure, nëse do ishte emri im pjesë e raportit për shkelje unë duhej të kisha marrë njoftim, qoftë dhe një sinjalizim por fakti që nuk kam njoftim zyrtar më bën të mendoj se mund të jeni gabim me emrin tim. Konfirmojeni zyrtarisht pastaj ma përmendni emrin ju lutem”, – tha dje Bojaxhiu.

Ka diçka që nuk shkon

Shqetësimi dhe dyshimet e zotit Bojaxhiu ishin racionale. Por emri i tij u konfirmua si pjesë e raportit. Ai ishte kallëzuar në prokurori. Po si ishte e mundur që ai vetë nuk dinte gjë? Për të zbuluar më tepër mbi atë që ishte duke ndodhur, iu referuam praktikave që ndjek KLSH-ja në raste të tilla. Ligji e detyron KLSH-në, se për çdo shkelje apo raport përfundimtar për kallëzim penal ndaj zyrtarëve, ka obligimin që një kopje të raportit KLSH-ja t’ia relatojë dhe institucionit ku kanë punuar ose punojnë këta zyrtarë. Pra raportin e KLSH-së me shkeljet dhe propozimet për masa të ndryshme që kishte shkuar në prokurori duhej ta posedonte në një kopje dhe INUK-u. Ndaj dhe mbrëmjen e djeshme iu drejtuam një zyrtari të lartë të INUK-ut, pikërisht zyrtarit që i kishte shkuar raporti përfundimtar i KLSH-së. Përgjigja që morëm prej zyrtarit të lartë të INUK-ut në surprizoi: “Po zotërinj unë e kam lexuar imtësisht atë raport. E kam përpara tani që po komunikojmë së bashku. Mund t’iu konfirmoj me përgjegjësi se emri i shtetasit Gjergj Bojaxhi që ju interesoheni nuk ekziston fare në këtë raport. Nuk ekziston në asnjë nga rekomandimet e KLSH-së për dëmshpërblim dëmi apo për masa ligjore. Emri i tij nuk figuron fare në këtë raport të KLSH-së që neve na ka ardhur i relatuar prej tyre në fillim të Nëntorit të këtij viti”, – konfirmoi dje zyrtari i INUK-ut.

Dritëhijet e një kallëzimi penal

Nga sqarimi që na ofroi zyrtari i lartë i INUK-ut mund të konstatohen dy elementë të rëndësishëm menjëherë:
1. KLSH-ja ka operuar me dy raporte, një raport zyrtar dërguar në INUK ku nuk figuron gjëkundi emri i Bojaxhiut. Si dhe një raport i dërguar nga KLSH-ja në prokurori ku kallëzohet penalisht Bojaxhiu.
2. Diferenca kohore mes raporteve sugjeron se futja e emrit të Bojaxhiut në raportin zyrtar është bërë vetëm pas javës së parë të nëntorit 2013 (sepse kemi si referencë raportin e parë që i shkoi INUK-ut nga KLSH-ja).
Të dy këto elementë bëjnë të qartë se KLSH-ja ka pasur një ngut dhe brenda harkut kohor të një muaji ka bërë me shpejtësi letrat për Gjergj Bojaxhiun dhe i ka nisur me urgjencë në prokurori. Po çfarë e justifikon këtë “shmangie nga programi” të KLSH-së dhe këtë punë me “2 raporte” të cilën ligji ia ndalon? Konteksti i këtij veprimi duket i lidhur me një ngjarje që është bërë temë e ditës muajin e fundit: Pallatin e vjehrrit të Bashës në Vlorë. Gjergj Bojaxhiu është zyrtari që dekonspiroi skemën e dyshuar kriminale dhe antiligjore të ndërtimit të këtij pallati, duke hapur i pari kutinë e Pandorës dhe duke futur në axhendën e vëmendjes politike(dhe jo vetëm) zbardhjen e asaj që kishte ndodhur me ndërtimin e këtij pallati.

Pra Bojaxhiu është strumbullari i telasheve të Lulzim Bashës, telashe të cilat, mund t’i faturojnë dhe arrestimin e të vjehrrit. Vjehrri i Bashës është i dyshuar aktualisht si ideator dhe përfitues kryesor i një skeme të rëndë që nis me falsifikime dhe prodhime antiligjore të vendimeve gjyqësore, regjistrimin e këtyre vendimeve në kadastër pasoja e të cilave ishte kalimi në pronësi e detit. Një histori e paprecedentë në lëmin e shumëllojshëm të falsifikimeve me letrat e pronave dhe me zhvatjen e tyre në Shqipëri. Të vendosura në kontekst, të gjitha këto të dhëna flasin se KLSH-ja është vënë me urgjencë në lëvizje muajin e fundit “për t’i qepur letrat”Gjergj Bojaxhiut dhe për ta çuar me urgjencë në prokurori si person nën hetim. Politikisht autoriteti që ka forcën e nevojshme për ta vënë në lëvizje “me porosi” KLSH-në është PD-ja,  ndërsa probleme direkte personale me Bojaxhiun në PD rezulton se ka vetëm Lulzim Basha, kreu i PD-së.

* * *

KLSH, kallëzim penal për Gjergj Bojaxhiun (denoncuesi i parë i pallatit të Bashës)

Kontrolli i Lartë i Shtetit ka bërë kallëzim penal në Prokurorinë e Tiranës për dy ishkryeinspektorë të INUK-ut, pasi akuzohen për shpërdorim detyre. KLSH thotë se gjatë auditimit të realizuar tek INUK, ka konstatuar një sërë shkeljesh tek dy ish-kryeinspektorët të cilët kanë drejtuar këtë institucion në vitet 2010-2012.

Në deklaratën për shtyp KLSH nuk i ka shënuar emrat e të paditurve. Por burime zyrtare i thanë DITA-s se bëhet fjalë për dy ish-kryeinspektorë, mes të cilëve, Gjergj Bojaxhi.

Bojaxhi është zyrtari që ka përgatitur dosjen me shkeljen e godinës tashmë të famshme të vjehrrit të Lulzim Bashës në bregun e Vlorës. Bashkë me Bojaxhi, me “akuzën e shpërdorimit të detyrës, pasi kanë penguar prishjen e ndërtimeve pa leje” është bërë kallzim penal edhe për Gezim Dautin.

“Kontrolli i Lartë i Shtetit, në zbatim të programit të auditimit nr. 562/1, datë 24.06.2013 të ushtruar në Inspektoriatin Ndërtimor Urbanistik Kombëtar, Tiranë, për periudhën 2010-2012, ka konstatuar një sërë shkeljesh si pasojë e të cilave ka çuar në prokurorinë e rrethit Tiranë për kallëzim penal, dy ish-kryeinspektorë të këtij institucioni, që e kanë drejtuar atë në vitet 2010 deri në 2012-ën, me akuzën e shpërdorimit të detyrës për: moszbatim të ligjit në evidentimin, pengimin dhe prishjen e ndërtimeve pa leje, si dhe mosadministrimin e vlerave materiale (automjetet e karburant) sipas kërkesave ligjore, moszbatim të afateve ligjore në procedurat për vjeljen e gjobave…” – thuhet ndër të tjera në kallzimin e KLSH dërguar në Prokurori.

Kontrolli i Lartë i Shtetit i ka kërkuar INUK-ut që të merren masa disiplinore edhe për 7 punonjës si dhe masa për largim nga puna për 7 punonjës të tjerë të INUK.