Veliaj: Është faji i sistemit, jo vetëm i njerëzve!

Sistemi është shkaktari kryesor që lejon dhe shkakton abuzimet, prandaj lufta kundër korrupsionit duhet të fillojë pikërisht nga ndryshimi i këtij sistemi. Ky ishte mesazhi që Ministri i Mirëqenies Sociale dhe Rinisë, Erion Veliaj, dha në fjalën e tij mbajtur në konferencën “Mbi një kuadër më efektiv në luftën kundër korrupsionit në Shqipëri”, në praninë e Kryeministrit Edi Rama dhe ministrave të tjerë të qeverisë.

Veliaj vuri në dukje se korrupsioni është një problem masiv, me të cilin përballen jo vetëm zyrtarët e lartë në qendër, por edhe zyrtarët lokalë, duke ritheksuar se nga auditi i kryer nga Kontrolli i Lartë i Shtetit në ish Ministrinë e Punës, Çështjeve Sociale dhe Shanseve të Barabarta janë gjendur shumë mangësi, parregullsi dhe shkelje të akteve ligjore dhe nënligjore në fuqi, për të cilat janë arrestuar si përgjegjës katër ish zyrtarë të kësaj ministrie.

Ministri Veliaj tha se sistemi i mbrojtjes sociale në Shqipëri ka vuajtur shumë nga korrupsioni, ku skemat më problematike kanë qenë Ndihma Ekonomike, Pensioni i Aftësisë së Kufizuar si edhe Pensioni i Invaliditetit të Punës. “Por, është e qartë se shkak kryesor i këtyre problemeve nuk janë vetëm njerëzit, pasi sistemi ka vuajtur nga cene që e kanë lehtësuar abuzimin dhe kanë rritur korrupsionin. Ndodhte që gjatë fushatave zgjedhore rritej në mënyrë artificiale numri i përfituesve nga këto skema, duke e shpënë sistemin e mbrojtjes sociale në prag të falimentit”, u shpreh ai gjatë fjalës së tij.

Nga ana tjetër, Veliaj nënvizoi se numri shumë i madh i komunave dhe bashkive, si edhe dhënia e kompetencave këtyre njësive vendore në lidhje me ndihmën ekonomike, invaliditetin e punës etj, ka bërë që të fryhen artificialisht skemat e ndryshme të mbrojtjes sociale. Rezultatet e auditimit të nismuar nga MMSR-ja treguan se kishte raste që PAK përfitonin nga dy statuse, çka rriste shpenzimet; fëmijë të anëtarëve të këshillit bashkiak apo komunal përfitonin pagesë të pamerituar; Ndihma Eknomike paguhej pa asnjë dokument që vërtetonte gjendjen ekonomike etj.

Për t’i bërë ballë kësaj situate, sipas Veliaj, komiteti i mjekëve që vlerësojnë PAK do të kalojë në varësi të MMSR-së ose Drejtorisë së Përgjithshme të SHSSH, e jo më rajonal. Gjithashtu, Ndihma Ekonomike do të reformohet në mënyrë që të ketë sa më pak transferta me para në dorë që të jetë e mundur, kur një pjesë të pagesave do të shndërrohen në fond të nxitjes së punësimit. “Do të synojmë që në vend të parave në dorë përfituesit të marrin ekuivalentë të vlerës në ushqime apo shërbime të tjera”, vijoi ai.

Veliaj përmendi edhe projektin për modernizimin e Asistencës Sociale, i cili bëhet në bashkëpunim me Bankën Botërore dhe do të ulë korrupsionin.