Trupi i një burri u gjet mëngjesin e djeshëm i pajetë anash segmentit rrugor Nikël-Kamëz. Dëshmitarët e zbuluan kufomën rreth orës 08:30, dhe policia mbërriti në vendngjarje duke bërë identifikimin e viktimës Enver Çangu, 49 vjeç, banues në fshatin Verion të komunës Nikël në Krujë.
Me marrjen dijeni për rastin në vend shkuan shërbimet e policisë vendore, duke pyetur dëshmitarët dhe më pas familjarët, me qëllim zbardhjen e ngjarjes, pasi dyshohet edhe për një vrasje. Sipas ekspertëve, viktima kishte trauma të shkaktuara nga një goditje tipike në aksident automobilistik. “Paraprakisht, nga veprimet e deritanishme ka dyshime se ngjarja mund të jetë shkaktuar nga një aksident automobilistik, por hetimet vijojnë”, bëri me dije policia vendore. Ngjarja ka ndodhur po orët e para të mëngjesit dhe mendohet se Çangu ka qenë duke u kthyer në banesë. Policia po heton për të zbuluar nëse aksidenti është i qëllimshëm, apo viktima u godit në shpejtësi teksa kalonte rrugën në këmbë.