Barazimi i marë në miqësoren e zhvilluar në Turqi me Bjellorusinë ka sjellë ngritjen me një vend në klasifikimin e FIFA-s për kombëtaren Shqiptare. Kështu kuqezinjtë e drejtuar nga De Biasi tashmë janë të pozicionuar në vendin e 57 të klasifikimit botëror, një vend larg Uellsit i cili ka humbur 12 shkallë në këtë renditje. Kështu pasi humbën 13 shkallë menjëherë në renditjen e muajit Tetor, kuqezinjtë nisën ringritjen, edhe pse për momentin me hapa të ngadaltë. Barazimi në miqësoren me Bjellorusinë ka bërë që Shqipëria të fitojë 8 pikë, pasi nga 563 pikë që kishte në muajin tetor, në renditjen e re numëron 571 pikë. Vështirë që renditja të ndryshojë për kuqezinjtë tanë në dy muajt e ardhshëm, pasi në këtë periudhë nuk parashikohen ndeshje të kombëtareve, në pritje të shkurtit kur do të nisin edhe sfidat miqësore. Ndërkohë renditjen e përgjithshme të FIFA-s e udhëheq Spanja, e ndjekur nga Gjermania dhe Argjentina. Kolumbia ruan vendin e 4 ndërsa bën hapa gjigandë përpara Portugalia, duke fituar 9 pozicione për tu renditur në vendin e 5. Uruguai ruan pozicionin e vet në vendin e 6 teksa fiton një shkallë në klasifikim Italia, që lë pas Zvicrën dhe Holandën, dy skuadra që humbasin nga një pozicion në renditjen e përgjithshme. 10-en parë e mbyll Brazili, teksa përfundon jashtë saj Belgjika dhe Anglia.