Zyra Qendrore Kombëtare Interpol Tirana, solli pasditen e djeshme në pranga nga Roma, të kërkuarin ndërkombëtar Klodian Gjeta, 29 vjeç, banues në Bulqizë. Sipas dosjes hetimore rezulton se Gjykata e Rrethit Bulqizë, me vendimin nr.43, të datës 13 nëntor 2006, e ka dënuar atë me 24 vjet burgim në mungesë, për kryerjen e veprës penale të “vrasjes me paramendim” dhe “armë mbajte pa leje”. Ngjarja ka ndodhur më 14 mars 2006, rreth orës 15:00, në vendin e quajtur karburant “Lleshi”, në fshatin Okshatinë të Bulqizës, kur Klodian Gjeta ka vrarë me armë zjarri shtetasin K. K. Krimi ka ndodhur për motive të dobëta, pas një grindje që autori dhe viktima kishin pasur disa orë përpara ngjarjes midis tyre, për të drejtën e kalimit me automjet, në një rrugë të ngushtë të fshatit Podgoricë. Pas grindjes për parakalimin në rrugën e ngushtë, ku asnjëri s’i ka hapur rrugë tjetrit, ka ardhur debati afër karburantit dhe përdorimi i armës së zjarrit. Pas krimit, Gjeta është arratisur nga vendi, duke i shpëtuar prangave të policisë, por është kapur pak kohë më parë në Itali, me qëllime ekstradimi.