Vritet pronari shqiptar i një restoranti në Harper Wood

Policia e qytezës Harper Woods ka bërë të ditur se pronari shqiptar i Restorantit “Royal Grill” në rrugën Kelly Rd u qëllua më armë dhe u vra në rrugicën mbrapa restorantit, të premten në darkë. Policia ende nuk e ka zbuluar dot vrasësin dhe po kërkojnë për automjetin që përvetësoi pasi kreu vrasjen.
Viktima, sipas medias lokale ishte shqiptari Altin Avdyli nga Roseville, Michigan.
“Zoti Avdyli ishte një anëtar i mirënjohur i komunitetit të Harper Woods community dhe bujaria e zemërmirësia e tij do të na mungojë shumë”, tha Jim Burke, Drejtori i Sigurisë Publike në Harper Woods.
Altin Avdyli sapo kishte mbyllur restorantin e tij për atë natë kur e qëlluan në kokë, rreth orës 10 të natës. Një fqinj e ka gjetur, të lënë aty përtokë në rrugicë dhe ka lajmëruar policinë.
Një tjetër, që punonte në këtë restorant e që nuk deshi të identifikohej i tha kanalit televiziv Fox2 se Altini kishte ardhur nga Shqipëria në kërkim të ëndrëss amerikane.

Policia u lutet të gjithëve që të mbajnë sytë hapur për automjetin e vjedhur të viktimës: Është ngjyrë gri, tipi: Chevy Camaro 2010, me shirita të zinj. Targa e makinës është: CFZ 9555. Çdokush që ka informacion duhet të telefonojë në numrin: 911, ose policinë në Harper Woods 313-343-2530 ose në mënyrë anonime numrin 1-800-SPEAKUP.
Por, policia paralajmëron që qytetarët të mos ndërmarrin veprime personale nëse e dallojnë automjetin; mjafton të njoftojnë policinë. Autori i vrasjes dhe vjedhjes mund të jetë i armatosur dhe i rrezikshëm.