Zgjedhjet europiane Merkel kryeson, euroskeptikët 6 deputetë

Sondazhet e fundit të zhvilluara mbi zgjedhjet europiane në Gjermani, shfaqin epërsi në kryesim të partisë së Merkelit. Kristianë-Demokratët e udhëhequr nga Merkel, pritet të marrin rreth 40% të votave, Social-Demokratët 28% , të Gjelbrit 9%  dhe partia e majtë gjermane Die Linke vetëm 3%, sipas sondazhit “Metapolls”.

Partia e re anti-euro AfD renditet me 6%, ndërsa Liberalët me 3%.

Që kur kriza e euros ka filluar, ka pasur një konsensus të përfaqësuar nga Merkel, e cila tashmë është në koalicion me Social-Demokratët, se përgjigjja për të dalë nga kriza është një konsolidim i mëtejshëm i Europës, që shkon drejt një federalizmi. Kjo ide vlerësohet si një aftësi ripërtëritëse e angazhimit gjerman në Europë. Por, politika dinamike në Gjermani është pothuajse pak a shumë e njëjtë në të gjithë Europën, sipas shifrave të Eurobarometër, përqindja në mbështetje njeh veçse rënie dhe zërat euroskeptikë janë gjithmonë e në rritje.

Megjithëse Merkel u rizgjodh për herë të tretë si kancelare në shtatorin e kaluar dhe ka ndërmarrë një përqasje graduale ndaj krizës së euros, partia e re gjermane euroskeptike Alternativa për Gjermaninë (AfD) arriti të merrte thuajse 5% të votave dhe për pak hyri në Bundestag. Një rezultat mbresëlënës për një parti, që u formua vetëm në shkurtin e vitit të kaluar.

Strategjia e Krisitanë – Demokratëve të Merkel ka qenë stigmatizimi i AfD-së, si një parti e ekstremit të djathtë, edhe pse është mjaft e ndryshme në ideologji, nga partia neo-Naziste NPD, që rrezikonte të futej në parlament në të kaluarën.

Shqetësim më i madh në Gjermani për pro- Europianistët, më tepër se dalja në skenë e AfD-së, është rritja e një euroskepticizmi të elitës intelektuale. Integrimi evropian, më tepër se në çdo vend tjetër, në Gjermani, ka qenë një projekt elite dhe nuk ka pasur kurrë një referendum popullor as për futjen e euros, apo miratimin e Traktatit të Lisbonës.  Që prej fillimit të krizës disa prej intelektualëve gjermanë si në krahun e majtë, po ashtu edhe në të djathtë nuk kanë qenë shumë pro politikave europiane të Merkelit. Në një vend, ku elita intelektuale publike ka një influencë shumë të madhe, kjo konsiderohet si më e rëndësishme në efektet që mund të krijojë, se sa vetë dalja e një partie euroskeptike, si AfD.

Ajo çka po rrit këtë euroskepticizëm, konsiderohet të jetë frika, që ekziston mbi një bashkim të mundshëm borxhesh në nivel europian, ku vende si Gjermania, duhet të paguajnë faturat financiare të vendeve në krizë.

Kohët e fundit (26 shkurt) Gjykata Kushtetuese, nëpërmjet një vendimi, ndryshoi pragun e hyrjes në parlament me 1%, duke gjykuar se pragu prej 5% ishte tashmë diskriminues për partitë e vogla dhe se për partitë e mëdha, ky prag nuk mund të shndërrohej në problem, pasi ato kanë mundësi të bëjnë aleancë mes tyre. Kjo ulje pragu në përqindje, i mundëson partisë euroskeptike AfD, të marrë deri në 6 deputetë për zgjedhjet evropiane, nga 96 që ka vendi, gjithmonë nëse rezultatet e sondazhit do të ngelen konstante (6%). Por, ky vendim i mundëson edhe partisë gjerësisht të njohur si neo-Naziste, NPD, të arrijë dhe të ketë një deputet në Bundestag në zgjedhjet e ardhshme legjislative, nëse do të ketë po këtë rezultat të zgjedhjeve të shtatorit 2013, me 1.3% të votave. Kjo do të përbëjë një veçanti për skenën politike gjermane, ku neo-nazistët mund të kenë për herë të parë, deputetin e tyre në zgjedhjet e ardhshme në Bundestag./im.ta/