Gjyqi i “xhihadistëve”, imamët: “S’kemi bërë asgjë, vdekshi të gjithë!”

Gjykata e Krimeve të Rënda Tiranë u ka rrëzuar kërkesën për gjykim të shkurtuar 9 të arrestuarve të cilësuar si “Grupi i xhihadistëve”, që akuzohen për nxitje të terrorizmit dhe rekrutim i luftëtarëve shqiptarë për t’i dërguar dhe financuar në Siri, përkrah ISIS.

Kaq ka mjaftuar që mes të dyshuarve kryesorë të grupit dhe trupës gjykuese të nisë një debat, deri edhe në mallkim. Secili prej tyre ka dhënë argumente duke thënë se ata nuk kanë vrarë njeri, por thjesht kanë shprehur mendimet e tyre për vuajtjet e myslimanëve në Siri.

Në fund të seancës, ka ardhur edhe “mallkimi” befasues: “Ju po lironi vrasësit, kujtoni se nuk i shikojmë në televizor ato që ndodhin (referuar vendimit të Hallunajt për pafajësinë e Arben Frrokut), ne s’kemi bërë asgjë. Allahu ju ndëshkoftë! Vdekshi të gjithë!”.

Një mallkim ky që nuk është marrë me aq seriozitet nga gjykata dhe prokurorët e çështjes. Katër nga pesë gjyqtarët që dhanë pafajësinë e biznesmenit janë në trupën gjykuese ndaj xhihadistëve.

Refuzimi i gjykatës

“Ne kemi shprehur mendimet tona dhe bindjen për atë se çfarë po i ndodh myslimanëve në Siri. Ju nuk jepni drejtësi, po luani teatër me ne.

Njerëzit po vrasin dhe ju po i lironi, e ndërsa ne po na gjykoni për mendimet dhe besimin që kemi”, janë shprehur dy të pandehurit Oltion Reçi dhe Astrit Tola, të cilëve iu refuzua kërkesa për gjykim të shkurtuar.

Në mesin e të pandehurve, kishte edhe nga ato që thanë se nuk i njohin ligjet e kësaj gjykate, por vetëm ato të Allahut. Të pandehurit në seancën e parë gjyqësore nuk pranuan të marrin avokat, por dje kishin autorizuar avokatin Roland Islami për t’i përfaqësuar.

Ky avokat, pas refuzimit të kërkesës për gjykim të shkurtuar kërkoi përjashtimin e trupës gjyqësore, duke kërkuar edhe shtyrjen e seancës. Gjykata miratoi vetëm kërkesën për shtyrjen e seancës për në datën 18 prill.

Debatet në sallë

“Kjo është gjykata e djallit, njohim ligjet e Allahut”, tha imami Zeqir Imeri, gjatë seancës gjyqësore. Ndërsa imami Bujar Hysa, akuzoi gjykatësit se kanë dhënë vendime pafajësie për vrasje. “Nuk jemi naivë, me ne bëni teatër”, iu drejtua ai gjykatësve”.

Imami ju drejtua 5 gjyqtarëve të Krimeve të Rënda, por në fakt nënkuptoi për pesëshen gjykuese që liroi Arben Frrokun javën e kaluar. “Ne nuk jemi terroristë, jemi besimtarë. Njerëzit po vrasin e presin dhe kjo gjykatë i liron, ndaj mos bëni teatër me ne”, tha Hysa më tej.

Dhe detaji interesant është fakti se 4 prej 5 gjyqtarëve të trupës që gjykuan Frrokun, janë pjesë edhe e trupës që po gjykon “grupin e xhihadistëve”. Dhe bëhet fjalë për kryesuesin Dritan Hallunaj, Liljana Bakun, Fran Prendin dhe Klodian Kurushin.

Mallkimi në gjyq

Duke mos ndryshuar qëndrim nga seancat e mëparshme imami i vetëshpallur Genci Balla ka deklaruar se ai si mysliman dhe 8 të pandehurit e tjerë, nuk mund të gjykohen nga ligje të tjera veç atyre të Allahut, pasi në të kundërt ata do të shkelnin mbi besim, duke ritheksuar se ata nuk e njohin gjykatën. Në përfundim të seancës, teksa trupa gjyqësore e kryesuar nga Liljana Baku njoftoi vendimin se seanca do të shtyhej, irritimi i Gerti Pashajt arriti deri në mallkim për gjyqtarët, ku deklaroi: “Deri atëherë vdekshi të gjithë ishallah!”.